Inai Oi Laloatao, A?

Vanegai idia halasia Gima Kohorona magasinidia edia hereva oi lalodia namonamo, a? Reana oi ura inai hereva do oi lalodia lou:

◻ Iesu ena boiboi Mataio 11:28 ai hegeregerena, edena dala amo ta be ‘ia dekenai ia mai’?

Iesu ia gwau: “Tau ta bema ia ura lauegu murina dekenai do ia raka, ia sibona ena ura do ia laloa lasi, to iena satauro do ia huaia, lauegu murina dekenai do ia raka.” (Mataio 16:24) Unai hegeregerena, ta be Iesu dekenai do ia mai, anina be nega ibounai sibona ena ura do ia dadaraia, Dirava bona Keriso edia ura do ia karaia totona, bona idia henia madunana do ia abia dae.​—8/15, rau 17.

◻ Mataio 7:​13, 14 ai Iesu ese ‘mauri gabuna ia lao dalana aukana’ ia herevalaia; badina be dahaka idia davaria taudia be “momo lasi”?

Dala maragina be Dirava ena taravatu bona hahegani ese idia biagua. Unai dainai, Dirava ena taravatu badinaia urana ia ura momokani tauna sibona mo ese unai dala ia ura henia. Ena be toana be ‘dala aukana’ ena taravatu ese ena ura ia koua, to ia ruhaia momokani. Ura kwalimu taravatuna “namona bona goevagoeva momokani” ese iena hetoana makadia ia atoa. (Iamesi 1:25)​—9/1, rau 5.

◻ Oiemu lalo-parara be edena bamona oi habadaia diba?

Lalo-parara ita abia haraga diba lasi bona ita abia kava diba lasi. To, bema oi haheauka, oi guriguri, oi hekwarahi, aonega taudia oi bamodia, Baibel ena hereva oi tahua bena oi laloa namonamo, bona Iehova ena lauma helaga dekenai oi tabekau, emu lalo-parara oi habadaia diba.​—9/1, rau 21.

◻ Edena dala ai mama ese namo ia havaraia diba?

Mama dainai ta ese ena lalokau tauna ia gimaia, ma ta ese do ia hakererea garina. Inai danu, taunimanima be dala maorona ai Iehova bona ena tomadiho dainai idia mama diba. (1 King Taudia 19:10)​—9/15, rau 8, 9.

◻ Genese 50:23 (NW) ese Iosepa ena tubuna be inai bamona ia gwauraidia: “Idia be Iosepa ena tuina latanai idia vara.” Unai hereva ena anina be dahaka?

Reana ena anina be Iosepa ese unai natu ia abidia dae iena tubuna korikoridia. Reana anina ma ta be ena tuina latanai ia atodia, bena idia ida ia gadara mai ena lalokau ida. Hari inai negai, tama ese edia lalokau be edia natudia dekenai unai bamona idia hahedinaraia be namo.​—9/15, rau 21.

◻ Headava taudia be edia mauri lalonai do idia kwalimu totona, gau badana be dahaka?

Do idia kwalimu totona, gau badana be nega ibounai Dirava ena ura idia tahua guna. Headava taudia be unai bamona idia kara neganai, idia badinaia heheni toho, bona Dirava ena sisiba badinaia karana amo edia hekwakwanai idia haoredia toho. Unai dala amo idia be lalohisihisi idauidau amo idia roho mauri, iena ura idia laloa lasi taudia ese idia davaria gaudia unai. (Salamo 19:​7-11)​—10/1, rau 11.

◻ Karaharaga lalohadaina, Dirava ese ia havaraia gauna, be hari inai negai ita abia be mai anina bada, a?

Unai bamona lalohadaina be mai anina bada, ta be Iehova ena hesiai do ia lao henia mai ena lalona ibounai ida totona. Diabolo ese Dirava ena hesiai taudia ia kara henidia, do ‘idia hesiku bona do idia manoka’ totona neganai, unai lalohadai ese ia durudia do idia koua. (Heberu 12:3) Ita ia gimaia, tanobada bona kohu momo do ita ura henia garina, bona ita ia durua, atai gaudia, “mauri gabeai,” do ita laloa. (1 Timoteo 6:19)​—10/1, rau 28.

◻ Mamoe bona nanigosi parabolena lalonai, edena negai Iesu be ena terona ai ia helai diho bona dahaka dainai? (Mataio 25:​31-33)

Unai parabole ese ia hahedinaraia lasi ia helai diho King dagina abia totona. Lasi, to ia helai diho kota karaia totona. Unai kota gaukarana be lagani momo lalonai do ia karaia lasi. To, unai parabole ese nega vairai ia herevalaia, unai negana ai Iesu be nega kwadogi lalonai bese ibounai edia latanai ena kota herevana do ia gwauraia bena edia davana do ia henidia.​—10/15, rau 22, 23.

◻ Iesu ese ia gwauraia loulou uruna be daidia?

Inai hereva, “inai nega idia noho taudia” (inai uru), amo Iesu ese iena negai idia noho Iuda besena taudia bona edia “matakepulu” hakaua taudia ia herevalaia. (Mataio 11:16; 15:14; 24:34)​—11/1, rau 14.

◻ Mataio 24:​34-39 ai Iesu ese ia gwauraia peroveta herevana ena anina ia vara negana ginigabena lalonai, inai hereva, “inai nega idia noho taudia,” ese daidia ia gwauraia?

Toana be Iesu ese tanobada besedia, Keriso ia lou mai vadaeni toana idia itaia to idia helalo-kerehai lasi taudia, ia herevalaia.​—11/1, rau 19, 31.

◻ Heau mauri hanuadia bona edia taravatu ese idaunegai Israelana ai idia noho taudia be edena dala amo idia hanamodia?

Unai ese ia hadibadia goevagoeva namona be nega ibounai taunimanima edia mauri do idia naria namonamo. Ma ia hadibadia namona be nega korikoridia ai do idia kara mai edia hebogahisi ida. (Iamesi 2:13)​—11/15, rau 14.

◻ Heau mauri hanuana ese ia laulaulaia gauna be dahaka?

Ia be Dirava ena hahemauri dalana, iena taravatu, rara ena helaga taravatuna, ita utua dainai do ita mase garina ita ia hamauria dalana unai. (Genese 9:6)​—11/15, rau 17.

◻ Iseda Keristani oreana ese ita be edena bamona ia durua diba, iseda goada do ita hamatamataia lou totona? (Isaia 40:31)

Ita davaria hekwarahidia o hahetohodia hegeregeredia iseda tadikaka bona taihu haida danu ese idia davaridia vadaeni, bona edia mamina be iseda hegeregerena. (1 Petero 5:9) Ita diba ita hisihisilaia gaudia be idau lasi bona iseda mamina be idau lasi​—unai ese eda lalona bona eda abidadama ia hagoadaia.​—12/1, rau 16.