Iehova Ena Witness Taudia Samania Herevana Idia Herevalaia

KOTA negana idia haidaua loulou murinai, vadaeni, June 8, 1995 ai, Court of Appeals Thessalonica, Greece dekenai, Iehova ena Witness hahine hani idia kota henidia totona idia hebou. Dahaka samania herevana idia karaia? Idia gwau lagani 50 ia noho Greek taravatu ta, ma haida edia tomadiho oi haidaua toho diba lasi taravatuna idia utua.

To, kota totona idia hebou neganai, idia davaria unai hahine hani ia dagedage henia pris​—samania herevana ia hamatamataia tauna unai​— be ia mauri noho lasi. Ma pris ta ia ura ena gabu ia abia, to kota ese unai ia abia dae lasi. Unai dainai kota negana ena lata be miniti 15 sibona! Kota biaguna ese idia samania witness taudia ia nanadaidia bona ia davaria unai hahine be ma haida edia tomadiho dalana haidaua toho karana idia karaia lasi. Unai hereva ese ia hahedinarai Greek kota idia ura lagani 1993 European Court of Human Rights ia karaia herevana idia matauraia bona do idia badinaia.

Hoa gauna be Witness hahine idia samania hahine toi be idia dekenai idia raka lao bona idia hanamodia mai edia kudouna ibounai ida. Idia ta ia gwau: “Idia vara gau ibounai dainai ai sori bada. Unai be emai kerere lasi. Pris ese ai ia doria umui ai samania totona. Hari ia mauri noho lasi dainai, ai ura emai hanua bona ruma dekenai umui mai.”

Iehova be ena taunimanima Greece dekenai kwalimu ia henia lou. Greece lalonai haida edia tomadiho haidaua lasi taravatuna be lagani 1938 bona 1939 lalonai idia haginia. Lagani 1993 ai, European Court of Human Rights ia gwau unai taravatu idia gaukaralaia Iehova ena Witness taudia samania totona be maoro lasi.​—Gima Kohorona, September 1, 1993, rau 27-31 itaia.