Basileia Haroro Ripoti

“Dirava Ena Hereva Ia Bada Daekau”

KERISTANI ekalesia oreana mai ena taunimanima 120 idia haginia, bena hora haida sibona murinai ena taunimanima edia momo ia daekau 3,000 mai kahana dekenai. (Kara 1:15; 2:41) Baibel ese ia hahedinaraia “Dirava ena hereva ia bada daekau, bona diba tahua taudia idia momo daekau Ierusalema dekenai.” (Kara 6:⁠7) Lagani haida murinai, idia haginia vadaeni ekalesia oreana matamatana ena Keristani taudia be Africa, Asia, bona Europe ai danu idia noho.

Hari inai negai danu, Keristani oreana be unai bamona ia tubu daekau noho. Hegeregere, Mexico dekenai, lagani ima lalonai Basileia harorolaia taudia edia momo be 130,000 amo ia bada ia lao ela bona 443,640! Lagani 1995 lalonai, Mexico dekenai taunimanima 59 59 amo ta ta be Iehova ena Witness taudia ida idia hebou Keriso ena mase laloa lou totona. To, lauma dalanai uma ena anina abia negana be ia do ore lasi unai gabu dekenai, inai ekspiriens ese ia hahedinaraia hegeregerena.​—⁠Mataio 9:​37, 38.

Taoni ta ladana Chiapas dekenai, ena be lagani 20 lalonai Iehova ena Witness taudia ese sivarai namona idia harorolaia, to ta lasi ese Baibel stadi ia abia dae. Unai hanua taudia ese tau ta idia gari henia, idia gwau ia be dagedage tauna. Idia gari bema do ia davaria idia be Witness taudia ida Baibel idia stadilaia, bona unai dainai do ia dagedage henidia garina.

Boga-auka Witness taudia rua idia lao unuseniai do idia noho totona, bona idia laloa unai hekwakwanai hanaia totona do idia lao unai tau dekenai bona do idia hereva henia. Ena ruma dekenai idia ginidae neganai, ena hahine ese iduara ia kehoa bona edia hereva ia hakala henia namonamo. Baibel ese ia gwauraia sivaraina, tanobada dekenai paradaiso noholaia sivaraina, be hahine ese ia ura henia bada. To, ia gwau bema Baibel do ia stadilaia ena tau ese do ia hahekwarahia bada. Witness taudia ese idia hamaoroa, bema Baibel ena hereva ia tahua namonamo lasi, Dirava tomadiho henia dalana do ia diba lasi bona tanobada dekenai mauri hanaihanai do ia moalelaia lasi. Baibel stadi ia abia dae.

Ia laloa hegeregerena, ena tau ia moale lasi ena lalohadai dekenai. Ia ese ia taravatua iena motuka do ia gaukaralaia lasi hebouhebou totona, to gaukara ma haida karaia totona ia gaukaralaia diba. Ena be ena tau ese ia dagedage henia, to nega ibounai Iehova ena Witness taudia edia Kingdom Hall dekenai ia raka lao​—⁠ena daudau be kilomita 10. Nega daudau lasi unai taoni taudia ma haida ese unai hahine ena boga-auka bona ena haheauka idia itaia. Bena Iehova ena Witness taudia ese edia ruma dekenai idia vadivadi henidia neganai, edia hereva idia kamonaia hamatamaia. Haida ese hebouhebou dekenai unai hahine idia bamoa danu. Daudau lasi Witness taudia be Baibel stadi 20 bamona idia karaia unai taoni dekenai!

Hari hahine ena turana ta, ena be ena tau ese ia dagedage henia, to ena lalona ia hadaia Baibel do ia stadilaia. Hoa gauna be inai, hahine ginigunana ena tau ese ia hagoadaia, stadi do ia hamatamaia. Unai tau be unai hahine ena adavana danu ia kiki, bena ena badu ia hadokoa. Vadaeni, Baibel ena hereva momokani ena uhena idia hadoa, bena lagani 20 murinai ia tubu matamaia unai. Taunimanima 15 bamona ese Baibel idia stadilaia bona Keristani heboudia idia lao henia. Idia bogaraginai be unai hahine ruaosi; hari idia ese sivarai namona idia harorolaia.