Irina Ia Ura Bada Ane Bukana

VANEGAI, Irina, lagani 9 kekenina ta Sofia dekenai, Bulgaria ai, be Iehova ena Witness ta ai ia lao bona bapatiso ia abia. Ia ura bada ane ia abia bona Ane amo Iehova Hanamoa bukana ena ane ia moalelaidia bada. Unai dainai Irina ese ena lalona ia hadaia hua ta ta, ane haida edia hereva do ia dibaia goevagoeva do ia laloatao totona.

Sikuli dekenai Irina ia ura bada gaudia ta be miusiki. Unai dainai, ane abia oreana lalonai Irina ia ura lasi do ia vareai neganai ena miusiki tisa be ia daradara. Dahaka dainai Irina ia ura lasi? Badina ia diba idia abia anedia momo ese ena bese ena ladana bada taudia bona dina helagadia, Keristani lasi tomadihona amo idia abia dinadia, idia hanamoa. Ane haida ese taunimanima idia hagoadaia, do idia gwau-edeede bona do idia dagedage edia bese ena lalohadai idia abia totona. Tisa be Irina ena lalohadai unai gau dekenai ia lalo-pararalaia lasi. Irina ese revareva ta tisa ia tore henia iena lalohadai tomadiho dekenai ia hadibaia totona—to ia durua lasi.

Irina ena tamana be mai ena lalohadai ta. Ia ese tisa dekenai Ane amo Iehova Hanamoa bukana ta ia henia, ia lalonai be Irina ia ura bada anedia idia noho. Dina haida murinai, tisa ese Irina ia boiria sikuli ena miusiki daiutuna dekenai. Ia ese Irina ia noia, iena ura anedia haida do ia anelaia—unai neganai Irina ena kalasi turadia do idia kamonai—bona tisa be piano do ia gadaralaia. Bena hora ta mai kahana lalonai unai bamona idia karaia! Tisa be ia gwauraia hedinarai, Irina ia ura bada ane bukana lalonai be tiuni namodia momo idia noho.