Edia Turana Hereadaena ese Ia Durudia

HETURA karana ta ese Iehova ena Witness taudia ia durudia bada herea. Unai be edia Turana hereadaena, Iehova Dirava ida idia hetura karana. (Iamesi 2:23 itaia.) Edia abidadama idia tohoa bada gaudia idia vara negadiai, ia ese ia durudia.

Gavamani aukadia ese idia biagua gabudia ai, Witness taudia edia abidadama karana be momo ese idia itaia bona idia hanamoa. Idia ta be Jiří Krupička, ia be tanobada ena aonega herevadia ia stadilaia profesa tauna bona saiens tauna ta. Lagani momo lalodiai Komiunis dibura kamepa lalonai ia noho, unai murinai lagani 1968 lalonai Czechoslovakia ia rakatania. Iena buka ladana Renesance rozumu (Diba Ia Hedinarai Lou Negana) lalonai, ia ese idia tuari lasi dainai dibura dekenai idia atodia Witness taudia edia hisihisi bona gini goada karana ia kikilaia.

Komiunis gavamani henunai, Witness taudia momo be edia abidadama dainai dibura dekenai idia atodia. Ena be dibura dekenai idia noho, to idia ura lasi uranium maini dekenai idia gaukara tuari durua totona. (Isaia 2:⁠4) Krupička ese lagani 1952 ai unai maini ta dekenai ia itaia gauna ta ia kikilaia. Ia ese taunimanima rua ia itadia, aisi ese ia koudia kaivakukudia bamona idia gini keru masemase negana ai. Daramu baketi ese edia kwaradia bona kemena idia koudia.

Krupička ia gwau: “Daba momokani amo murimuri ai idia gini mai edia dibura dabua hedaredia danu. Edia aena idia keru masemase neganai, edena bamona nega daudau lalonai idia gini noho diba? Edia abidadama ena siahu amo. Unai daramu be idia gunana bona idia rasta. Hebogahisi lasi tauna ta ese unai tatau edia kwaradia bona pagadia dekenai ia doridia diho vadaeni mai ena goada ida, unai dainai daramu ena isena, mai matana ese tau ta ena dabua ia darea, bona iena kopina ia ivaia, bona rara be iena dabua ena imana amo ia heau diho.

“Gadi tauna ese idia vairanai ai ia haginia, bena komanda tauna ese hereva kwadogina ia henia ai dekenai. Ia gwau, idia ura lasi gaukara taudia be gwau-edeede taudia, bona edia kerere hegeregerena idia panisidia. Inai tuari inai henia taudia, gavamani inai henia taudia, edia hereva kavakava, tuari bona ala-ala gwauraia dika herevadia ese do idia durudia lasi.”

Komanda ese auri ta ia abia isi, bona daramu ta ia botaia. Ia lalonai ia noho tauna ia moru, bona unai daramu be iena kwarana ia do koua noho. Unai murinai ia vara gauna be Krupička ese ia laloatao hanaihanai.

Ia gwau: “Unai daramu lalodia amo ane regedia idia mai. Regerege maragidia, metairametaira Dirava idia guriguri henia, ia be gabu idauidau amo gau ibounai ia kamonaia diba. Idia rasta uranium daramu gunadia lalonai idia abia toho anedia danu ia kamonai diba. Dirava ena taiana ai edia ane regedia be bada herea, dubu lalonai idia abia anedia edia regena ia hanaia.”

September 1, 1993 ai, Czech Repablik dekenai gavamani ese Iehova ena Witness taudia ia abidia dae bona gwaumaoro ia henidia. Czech Witness taudia be hari idia moale bada, badina edia Keristani hahediba gaukarana idia karaia diba, taravatu be lasi. Oibe, ma haida dekenai, Iehova, edia Turana hereadaena do idia herevalaia mai edia moale bada ida.

[Picture on page 7]

Hebouhebou taudia Czech Repablik dekenai