Gorere Taudia Edia Ura Idia Matauraia

‘Bema rara lau henia diba lasi, inai opereisini karaia dalana be lasi. Bema oi ura inai opereisini do oi abia, namona be gwaumaoro be lau oi henia, lauegu dala hegeregerena do lau karaia. Bema gwaumaoro do oi henia lasi, namona be doketa idauna ta do oi tahua.’

DOKETA ena hereva ese Cheng Sae Joo, Thailand ai ia noho Iehova ena Witness hahinena ta, ena abidadama ia hamanokaia lasi. Doketa taudia idia gwau Cheng ena gorere be meningioma, anina be ena kwara harana ai gau ta ia tubu, bona opereisini ia abia haraga be gau badana. To ena lalona ia hadaia auka Baibel ena taravatu do ia badinaia; gauna be: “Rara . . . do umui dadaraia noho.”​—⁠Kara 15:​28, 29, NW.

Cheng be hospital ma rua ia lao henidia, badina be ia ura bema mai dalana iena tano ai unai opereisini do ia abia. Ena lalona ia hisihisi, badina be unuseniai danu doketa taudia idia gwau, bema rara idia henia diba lasi, opereisini idia karaia diba lasi. Dokonai, Hospital Information Services (HIS) Thailand ai ese dala idia karaia, Cheng ese Neurological Institute, Tokyo Women’s Medical College ai, do ia tore henia totona. Unai hospital ai idia ese gorere taudia, edia kwara harana ai gau ta ia tubu taudia, 200 bamona be kara matamatana ta amo idia kara henidia vadaeni; kaia idauna ta, ladana gamma kaiana, idia gaukaralaia.

Dala idia karaia Cheng be Japan ai Witness ruma besena ta ida do ia noho. Edia ruma be hospital kahirakahira dekenai. Peleini ia diho gabuna ai Witness taudia haida be Cheng idia hedavari henia; idia rua be Thai gado gadolaia taudia bona ta be HIS oreana tauna ta. Pura ta bamona lalonai doketa taudia ese Cheng ena gorere idia tahua loulou, unai murinai idia hamaoroa hospital ai do ia noho, bena gamma kaiana amo idia kara henia. Hora tamona sibona lalonai unai kara idia karaia ore. Kerukeru Cheng be hospital amo ia doko, bena ma dina ta murinai Thailand ia lou henia.

Cheng ia gwau: “Guna lau diba lasi unai dala amo unai bamona heduruna bada idia henia diba. Idia hahedinaraia lalokauna bona idia momo idia gaukara hebou dalana be lau hoalaia.”

Japan ena niuspepa ta ladana Mainichi Shimbun ese unai ia ripotilaia, ia gwau: “Ema bona hari, taunimanima ese edia tomadiho dainai rara henia hanai karana idia dadaraia, be haida ese idia herevalaia momo. To, rara henia hanai karana amo, rara abia tauna ese AIDS eiava hepataitis C gorerena ia abia diba, o bema unai rara be ia dekenai ia hegeregere lasi, dala idauna ta ai ia hadikaia diba. Unai gau dainai taunimanima haida idia ura lasi rara do idia abia, herevana edia tomadiho dalana be dahaka.”

Niuspepa be ma ia gwau: “Rara idia dadaraia taudia momo ese heduru idia abia dalana tamona be hospital idauna ta dekenai idia hanai lao, to namona be hospital oreadia ese edia kara idia haidaua bona gorere taudia edia ura idia matauraia. Namona be doketa ese ena kara ena anina be gorere tauna do ia hadibalaia goevagoeva guna bena ena gwaumaoro do ia abia. Rara henia hanai karana be idau lasi. Namona be idia diba inai be mai anina, tomadiho oreana tamona dekenai lasi, to taunimanima iboudiai dekenai.”

Doketa taudia edia heduru idia ura henia to rara idia ura henia lasi taudia momo, be hospital idaudia dekenai idia hanai lao, Cheng Sae Joo ia kara bamona. Unai taunimanima ese gorere taudia edia ura idia matauraia doketa taudia edia hekwarahi idia laloa bada.

Iehova ena Witness taudia ese Hospital Information Services be Watch Tower Society ena brens idauidau ai idia haginia, Witness taudia edia abidadama idia matauraia doketa taudia edia heduru tahua totona. Tanobada hegegemadai, HIS ese hospital, doketa taudia, sisita bona nesi taudia, loea taudia, bona kota taudia ida gaukara hebou daladia idia karaia.