Kota Biaguna Gunana ese Ena Sori Herevana Ia Gwauraia—Lagani 45 Murinai
AUGUST 1995 ai, kota daiutuna lalonai Berlin ai, Kota Badana ena biaguna gunana ese lagani 45 gunanai ia karaia kara dika dainai, Iehova ena Witness tauna ta dekenai ena sori herevana ia gwauraia.
October 1950 ai, German Democratic Republic (GDR) ena Kota Badana lalonai Iehova ena Witness taudia 9 idia samania, idia gwau idia ese gavamani dagedage henia karana idia havaraia bona spai gaukara idia karaia. Rua edia kota panisi be dibura dekenai do idia noho ela bona idia mase, bona 7 ma haida—idia ta be Lothar Hörnig, ena mauri lagani be 22, laulau lalonai ia be idia samania tauna namba hani idibana kahana amo—be lagani momo lalonai dibura dekenai idia siaia.
Lagani 40 idia ore murinai, GDR be Federal Republic of Germany ena kahana ta ai ia lao. Unai negana amo gavamani opesi taudia ese GDR lalonai idia karaia hahemaoro kerere karadia idia tahua bona unai kara idia karaia taudia be kota dekenai idia samania. Lagani 1950 lalonai Kota Badana ese Witness taudia ia samania be unai hahemaoro kerere karana ta.
Witness taudia 9 idia kota henidia neganai, kota biagudia toi amo ta be A. T., hari ena mauri lagani be 80. Hari, ia ese hahemaoro ia hagagevaia dainai idia samania, bona Berlin ena Kota dekenai ia hedinarai ena kara ena badina ia hadibaia namonamo totona.
Kota lalonai ia hereva neganai, ia gwauraia hedinarai lagani 45 gunanai ia vouti karaia do idia panisidia totona, ena be iena ura be unai bamona panisi aukadia idia henidia lasi. To hari idia karaia kota dainai ia laloa namonamo matamaia. Badina be dahaka? Tanobada ibounai tuarina iharuana lalonai, Nazi taudia ese Iehova ena Witness taudia idia dagedage henia badina idia ese Hitler idia badinaia lasi. Tuari ia ore murinai Komunist taudia ese Witness taudia idia dagedage henia lou. Unai neganai kota biaguna be ia “lalohisihisi bada.”
Lothar Hörnig ese kota taudia ia hadibaia lagani ima mai kahana lalonai dibura daiutuna ta lalonai ia sibona ia noho bona Brandenburg dibura dekenai ia noho ela bona lagani 1959 ai idia ruhaia. Kota biaguna gunana ese Hörnig ena hereva ia kamonai neganai, ia taitai bona ia gwau, “Lau sori bada herea. Mani lau oi gwauatao.” Hörnig ese ena sori herevana ia abia dae.—Luka 23:34 itaia.
[Picture Credit Line on Page 32]
Neue Berliner Illustrierte