“Laiona Ena Lalona” Oi Abia Diba

NEGA haida Baibel ese laiona ia herevalaia neganai, gari lasi bona abidadama ia laulaulaia. Tuari taudia goada herea eiava gari lasi taudia ia herevalaidia, ia gwau “edia lalona be laiona ena lalona bamona,” bona kara maoromaoro taudia ia gwauraidia ‘gari lasi taudia, laiona bamona.’ (2 Samuela 17:10; Aonega Herevadia 28:⁠1) Ta ia ura laiona ia heai henia neganai, laiona be ia hahedinaraia ‘uda gaudia edia huanai ia sibona be goada bada herea’.​—⁠Aonega Herevadia 30:⁠30.

Iehova Dirava ena ura iena taunimanima do ia naridia totona, be laiona ena gari lasi karana bamona ia gwauraia. Isaia 31:​4, 5 ia gwau: “Laiona ese mamoe ta ia dogoatao, bona ia ese mamoe ia ania hamatamaia neganai, mamoe naria taudia be do idia boiboi badabada, laiona do idia hagaria, bona do ia heau totona. To ia be do ia gari lasi, do ia heau lasi. Inai bamona danu lau, Siahu Ibounai Lohiabada ese Siona Ororona lau naria. . . . Do lau naria noho, bona do lau hamauria.” Iehova ese iena hesiai taudia ia hamaoroa do ia naridia, hekwakwanai idia davaria neganai.

Baibel ese taunimanima edia inai tauna badana, Satani Diabolo, be ia boiboi badabada, hitolo laiona bamona ia gwauraia. Ita do ia ania lasi totona, Baibel ese ita ia hamaoroa, ia gwau: “Do umui laloa maoromaoro, bona naria namonamo.” (1 Petero 5:⁠8) Unai bamona ita karaia dalana ta be lauma dalanai ita mahuta garina, ita naria namonamo. Unai hegeregerena Iesu ia gwau: “Do umui naria namonamo, aniani bona kekero muramura bona tanobada ena laloa metau momo gaudia ese emui lalona do idia guia garina.” (Luka 21:​34-36) Oibe, inai “nega ena dokona” lalonai lauma dalanai ita noga noho karana ese ita ia durua “laiona ena lalona” do ita abia, ia be ‘gari lasi gauna, badina ia ese Iehova dekenai ia abidadama henia goada noho.’​—⁠2 Timoteo 3:1; Salamo 112:​7, 8.