“Idia Oi Lulua Lasi!”

NIUSPEPA ta ladana Corriere della Sera, ia gwau: “Bema Iehova ena Witness taudia ta, eiava rua, ese oiemu iduara dekenai do idia pidipidi, idia oi lulua lasi!” Ia ese Treviso, Italy ena not kahanai ia vara gauna ia herevalaia, unuseniai bisinesi tauna ta ese lire milioni ta mai kahana (K800 bamona) be kahirakahira ia haboioa gwauraia, badina ia idia vadivadi henia Witness taudia rua ia lulua dainai.

Unai niuspepa ia gwau, ruma tauna ese idia ia diba totona unai Witness taudia idia gwau: “Hari dina be dina namona oi dekenai. Ai be Iehova ena Witness taudia bona davana bada gauna ai mailaia oi ai henia totona.” Unai neganai mai badu bisinesi tauna ese iduara ia koua, bona edia hereva idia haorea diba lasi.

Bema ia kamonai, do ia diba Witness taudia be ena ruma dekenai idia mai badina idia ura ena moni puse idia henia lou, idia ese loaloa umana ena helai gauna latanai idia davaria. Witness taudia be gau tamona sibona idia karaia diba, idia ese unai moni puse bona ia lalonai idia noho gaudia be pulisi steiseni dekenai idia abia lao. Kerukeru, pulisi ese iena biaguna maorona dekenai idia henia.

Il Gazzettino di Treviso ia gwau: “Bema tau idauna ta ese [Witness] taudia be idia karaia toho to idia kwalimu lasi karana ia karaia toho, reana ia ese . . . moni puse ena moni ia dogoatao. To Iehova ena Witness taudia be unai bamona idia karaia lasi, idia be kara maoromaoro taudia.”

Iehova ena Witness taudia edia “kara maoromaoro” ena badina be dahaka? Ena badina be Dirava bona edia dekena taudia idia lalokau henia, Iesu ena hadibaia hereva hegeregerena. (Mataio 22:​37-​39) Unai bamona dainai danu, Iehova ena Witness taudia be ruma ta ruma ta idia lao, Iehova Dirava ia gwauhamatalaia “tanobada matamatana” ena sivarai namona idia harorolaia totona. Unai bamona helaro herevana ena namo ese kohu ibounai edia namo ia hanaia!​—2 Petero 3:​13.