“Iehova ese Egu Guriguri Ia Haerelaidia!”

TANOBADA hegegemadai, Iehova ena Witness taudia ese kahirakahira Baibel stadi milioni ima idia karaia Dirava bona ena ura namona taunimanima dekenai diba maorona idia ura abia taudia ida. Iehova ena Witness taudia edia huanai idia noho natudia danu ese unai hadibaia gaukarana idia durua. Mani mero maragina ladana Joel ena haheitalai ita laloa. Ena mauri ia gwauhamatalaia Iehova dekenai bona ena mauri lagani be 9 neganai bapatiso ia abia. Lagani ta murinai ia be inai ekspiriens ia davaria:

“Nega ta haroro gaukara lau karaia neganai, hahine ta ladana Candy lau davaria. Lau ese “Itaia! Lau ese Gau Iboudiai Lau Hamatamataia” buklet lau henia toho. To ia gwau ia be mai ena vadaeni. Unai dainai lau ese Mauri Hanaihanai Paradaiso Lalonai bukana lau henia toho. Unai buka danu ia abia vadaeni. Bena lau laloa, ‘Ia dekenai Baibel stadi do lau herevalaia.’ Ia ese Baibel stadi ia abia dae!

“Candy ena taihuna, kensa gorerena dainai ia mase gwauraia hahinena, be ia mai idia ida ia noho totona. Danu, Candy ese hospital sista ena gaukara ia stadilaia. Nega sisina lalonai, Baibel stadi ai karaia lasi. To lau bona egu tama sina ese ia ai vadivadi henia bona magasin haida ai rakatania ia eiava ena adavana, Dick, dekenai. Dick ese ai ia hamaoroa Candy ese ena bedi badinai magasin ia atoa bona hanuaboi ai ia duahidia.

Gabeai, Candy ena taihuna ia mase. Lau bona egu Tamana bona Sinana be Candy ida mase taudia edia noho ai kikilaia. Ena lalona ia hadaia Baibel stadi do ia hamatamaia lou. Ma dina ta ai, Dick ai nanadaia bema ia ura Candy ida stadi do ia abia bona famili stadi bamona do idia karaia. Ia laloa unai be lalohadai namona. Unai dainai hari Tamana bona lau be Dick bona Candy ida ai stadi. Idia be stadi karana idia goadalaia bona Baibel stadi idia laloa bada.

“Lau be Baibel stadi totona lau guriguri, bona Iehova ese egu guriguri ia haerelaidia!”