Daika Ena Kerere Dainai Tuari Idia Vara?

DIRAVA ena kerere dainai taunimanima ese tuari idia karaia, a? “Lasi, Dirava ese tuari ia ura henia lasi.” Unai be Martin Niemöller, German ena ladana bada Protestan dubu haroro tauna ena haere, Tanobada Ibounai Tuarina Iharuana ia ore murinai ia gwauraia. Iena hereva be lagani 1946 ai inai buka ladana Ach Gott vom Himmel sieh darein​—Sechs Predigten (Dirava e, Guba amo Oi Itaia​—Haroro Herevadia 6) ai idia halasia.a Unai buka ia gwau:

“Ia gwau Dirava ena kerere dainai [tuari] idia vara tauna ese Dirava ena hereva ia diba lasi, o ia ura lasi ia diba. To momokani, henanadai idauna ta be, ita Keristani taudia be iseda kara kerere dainai tuari idia vara noho, eiava lasi? Bona unai henanadai do ita dadaraia haraga diba lasi. . . . Mai eda daradara lasi ida ita laloatao idia hanaia laganidia momo lalonai, Keristani dubudia be tuari, tuari taudia, bona tuari kohudia idia hanamoa mai edia moale ida, bona Keristani lasi dalana ai idia guriguri edia inai taudia be tuari lalonai idia haorea totona. Unai karadia ibounai be iseda kerere bona iseda tubudia edia kerere, to unai be Dirava ena kerere lasi. Bona hari ita noho Keristani taudia be mai eda hemarai ida ita gini idia gwauraia Earnest Bible Student taudia [Iehova ena Witness taudia] oreana edia vairanai, idia handred bona tausen momo be dibura kamepadia dekenai idia lao bona idia mase [danu] badina idia ura lasi tuari lalonai idia vareai, bona taunimanima pidia mase karana idia dadaraia.”

Hari, Tanobada Ibounai Tuarina Iharuana ena lagani 50 bamona murinai, Niemöller ena herevadia ese maino idia ura henia taudia edia lalona idia veridia. Taunimanima ese rara bubua kerere karana idia karaia be Dirava ena kerere dainai lasi! Iena tomadiho momokani taudia, tanobada ena hepapahuahu karadia amo idia gini siri taudia amo, Dirava ese taunimanima ia hadibaia noho tuari iboudiai be kahirakahira do ia haorea momokani.​—Salamo 46:9; Ioane 17:16.

[Footnotes]

[Picture Credit Line on Page 32]

USAF photo