Greece Dekenai Iehova Ena Witness Taudia Idia Kwalimu Lou
OCTOBER 6, 1995 ai, Athens dekenai Majistreit edia Kota lalonai kota taudia toi ese Iehova ena Witness taudia rua, ful-taim haroro taudia, idia hahemaoro henidia. Pulisi opesa ta ena ruma idia vadivadi henia murinai, ia samanidia, ia gwau ena lalona idia ania edia tomadiho dalana do ia badinaia.
Kota biaguna ena henanadai ese idia hahedinaraia ia ura bada Iehova ena Witness taudia edia gaukara do ia dibaia. Ia nanadaidia, ia gwau: “Inai gaukara umui karaia negana ena daudau be edena bamona? Unai lagani lalodiai taunimanima ese umui edena bamona idia kara henia? Emui gaukara ese dahaka anina ia havaraia? Taunimanima edia iduara ai idia dekenai dahaka umui gwau?” Kota lalonai idia helai taudia iboudiai ese edia haere namodia idia kamonaia namonamo.
Unai Witness taudia idia hoa bada, badina be gavamani ena loea danu ese ia hanamodia. Ena hereva ena dokonai ia gwau: “Gavamani ena taravatu hegeregerena, Iehova ena Witness taudia be mai edia gwaumaoro, edia Dirava do idia abidadama henia bona do idia tomadiho henia sibona lasi, to edia abidadama be iduara ta ta ai, ariara ai, bona dala ai do idia harorolaia danu, bona bema idia ura neganai, edia buka do idia hariharilaidia, davana lasi.” Unai loea ese kota haida bona Gavamani ena Kaunsolo edia hahemaoro herevadia, samani herevadia koua herevadia, ia gwauraia. Kokkinakis ese Greece ena gavamani ia samania sivaraina danu ia herevalaia, unai neganai European Court of Human Rights ia gwau Iehova ena Witness taudia be maoro.a Unai loea be ma ia gwau: “Mani inai umui laloa, unai neganai Greece be faini moni ia henia. Unai dainai namona be do ita naria namonamo, inai kara do ita hahemaorolaia neganai. Momokani, inai kara sivaraidia be kota dekenai idia mailaia lasi be namo.”
Gavamani ena loea ena hereva murinai, Witness taudia edia loea ese ma hereva momo ia gwauraia be anina lasi. To, ia be mai ena nega namona dainai, ia hahedinaraia ta ena abidadama haidaua karana taravatua be kerere, bona unai taravatu ese Greece ia hahemaraia, bese idauidau vairadiai.
Kota biaguna ese ena bamona diadi ruaosi ia itadia, bena idia toiosi idia gwau unai tadikaka bona taihu be mai edia kerere lasi. Unai kota negana ena lata be hora ta bona miniti 10; ia lalonai Iehova ena ladana bona ena orea taudia idia kwalimu.
Unai be kota ese Iehova ena Witness taudia Greece dekenai edia haroro gaukarana be unai bamona idia gwauraia maoro negana ihahanina, European Court of Human Rights ese Kokkinakis ena hereva idia hahemaorolaia murinai. Idia moale, badina be hari inai negai hekwakwanai ta ta sibona be edia haroro gaukarana dainai idia vara, bona tau ta ese edia gaukara ia koua diba lasi.
[Footnotes]