Basileia Haroro Ripoti
‘Emui Diari Taunimanima Edia Vairanai Do Umui Hahedinaraia’
IESU be ororo dekenai ia haroro neganai, iena hadibaia taudia ia hamaorodia: “Umui be tanobada taudia ibounai edia diari.” Ia hagoadadia ia gwau: “Umui emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai, umui emui Tamana guba dekenai do idia hanamoa.”—Mataio 5:14-16.
Italy dekenai Iehova ena Witness taudia edia kara namo be taunimanima ese idia itaia. Hegeregere, lagani ta ta idia karaia hebouhebou badana idia lao henia neganai, edia kara namo ese Dirava ia hanamoa, inai ripoti ese ia hahedinaraia bamona:
▪ Terni, Italy dekenai, hahine ta be lagani momo lalonai iena natuna kekeni ia durua aniani gabuna ta ia naria, steidiam badinai. Ia gwau: “Lau itaia soka gadara totona idia mai taudia bona Iehova ena Witness taudia edia hebouhebou totona idia mai taudia edia kara be idau vaitani. Witness taudia edia dabua be namo herea bona idia kara maoromaoro bona idia be mai edia hemataurai. Nega momo lau sibona lau nanadaia edena bamona bese idauidau taudia be idia noho hebou namo herea diba.
“Dina ta Witness ta ese dala dekenai lau ia davaria bona lau ia nanadaia bema Dirava ena ladana lau diba. Lau diba lasi, bona lau do ia vadivadi henia lau abia dae, badina lau diba Iehova ena Witness taudia be taunimanima namodia. Taunimanima idia mase neganai dahaka ia vara lau henanadailaia, bona ia be Baibel amo ia haere. Daradara lasi ida, Baibel stadi lau abia dae, bona pura rua murinai hebou dekenai lau lao matamaia.
“Matamanai egu natuna kekeni ese lau ia badu henia, to egu kara bona egu lalo-goada dainai iena lalohadai ia haidaua. Hua 9 idia hanaia vadaeni egu Baibel stadi lau karaia matamaia. Hari egu natuna kekeni bona iena adavana ese edia aniani gabuna dekenai idia lao Witness taudia idia hereva namo henidia. Lau be inai steidiam dekenai idia karaia hebouhebou ta dekenai lau bapatiso.”
▪ Roseto degli Abruzzi dekenai idia karaia hebouhebou ta murinai, kamepa ta ena naria tauna ia gwau: “Lau itaia Iehova ena Witness taudia be kara maoromaoro idia badinaia edia kara ibounai lalonai. Vanegai pura lalonai, idia ibounai 40 be egu kamepa dekenai idia noho, bona idia be hekwakwanai ta idia havaraia lasi. To idau, idia sibodia be lau dekenai idia mai bona idia hadibaia bema ma ta be edia mahuta gabuna eiava palai rumana dekenai ia mahuta. Lau diba, idia be egu kamepa idia gaukaralaia taudia namodia.”
▪ Unai hebouhebou tamona murinai, hotel naria tauna ia gwau: “Iehova ena Witness taudia iboudiai be maino taudia. Regerege bada idia karaia lasi, bona idia mahuta haraga. Idia be hebogahisi, kara maoromaoro bona kara namo taudia. Bema taunimanima ibounai be idia bamona be namo herea. Haida be gau ibounai idia henaodia—palaoapalaoa atoa kavabudia, kuku momoru atoa gaudia, toilet pepa danu bona suga! Unai bamona kara ta umui karaia lasi. Adorahi ai emui natudia ese frisa amo ice-cream idia abia neganai, lau lao lasi dahaka idia abia lau sekea totona. Idia abia gaudia edia davana idia hagaua bona karaharaga idia mai davana idia henia. Idia lau abidadama henia vaitani. Bema taunimanima haida be unai bamona be do ia namo herea! Lau ura hotel dekenai idia noho taudia ibounai be Iehova ena Witness taudia.”
Tanobada ena kahana momo dekenai, taunimanima be Iehova ena Witness taudia idia diba, Italy dekenai idia diba hegeregerena. Idia ese ‘Dirava idia diba lasi taudia edia vairanai, kara namodia idia karaia,’ bona unai amo iena ladana idia abia Dirava momokanina idia imodaia.—1 Petero 2:12.