Samani Herevadia Koikoidia Idia Koua France Dekenai

VANEGAI, France dekenai Iehova ena Witness taudia be hereva koikoidia momo amo idia samania. Tomadiho oreadia kavakavadia dainai Europe bona Japan ai idia vara hisihisidia edia sivarai be TV bona niuspepa oreadia ese idia gaukaralaia, Witness taudia sivarailaia koikoi totona. Idia gwau idia be tomadiho oreana dika hereana bona bada hereana.

Unai kerere hamaoromaoroa totona, Iehova ena Witness taudia ese pepapepa ta idia halasia, ia lalonai idia haerelaia henanadaidia haida be inai: Iehova ena Witness taudia be daidia? Idia be Keristani taudia eiava? Doketa edia heduru idia abia dae, a? Dahaka dainai ruma ta ruma ta dekenai idia lao? Edia gaukara durua monina be edena bamona idia abia? Iehova ena Witness taudia ese edia tano taudia dekenai dahaka namo idia havaraia?

Unai hahediba pepapepana, France gado ai idia halasia gauna, ena ladana be Iehova ena Witness Taudia​—Inai Oi Diba be Namo. Taunimanima momo herea dekenai unai pepapepa do idia henia totona, dala idia lailaia. May 13 ela bona June 9, 1996, milioni 9 mai kahana idia hariharilaia.

Unai pepapepa be gavamani taudia haida bona ma taunimanima momo ese idia laloa bada. Provinsi ena kaunsolo tauna ta ese ta ia duahia murinai, inai hereva ia torea: “Iehova ena Witness taudia idia samania herevadia ese lau idia habadua bada. Nega momo lau diba emui gaukara amo taunimanima umui durudia bona sibona emui namo umui tahua lasi.” Europe ena Palamen ena memba ta ese pepapepa ia duahia murinai, inai hereva ia torea: “Taunimanima momo idia diba umui Keristani taudia emui orea be idau bona unai tomadiho oreadia kavakavadia be ma idau.”

Brittany ai, Witness tauna ta ese pepapepa be pris tauna ta ia henia neganai, ia abia dae haraga. Pris tauna ia gwau: “Umui karaia gaukarana dainai umui lau hanamoa.” Ma ia gwau: “Egu dubu orea taudia lau hagoadaia, edia ruma lalodiai umui do idia abia dae bona kofi kapusi ta be umui do idia henia. Do oi hedavari henidia taudia do oi hamaoroa diba egu ruma oi mai henia vadaeni. Inai danu, lau ura oi lau hamaoroa emui buka lau duahidia mai egu moale ida.”

Pepapepa ia abia murinai, Protestan tauna ta Alsace dekenai ese Watch Tower Society ia tore henia, Baibel stadi ia noia. Ia gwau: “Egu dubu oreana lau abidadama henia lasi momokani dainai, lau ura lauma dalana matamatana ai do lau raka.” Ena be nega haida taunimanima haida ese idia samanidia koikoi, to Iehova ena Witness taudia France lalonai​—bona tanobada ena kahana iboudiai dekenai​—ese taunimanima idia durudia noho, Dirava ena palani, Baibel lalonai idia hedinarai gaudia, do idia dibaia maoromaoro totona.​—2 Timoteo 3:​16, 17.