Iehova Idia Hanamoa Headava Negadia

Inai hereva Keristani headava negadia dekenai be Ethiopia ai idia hegaegaelaia guna, vanegai unai tano dekenai Iehova ena Witness taudia ai idia lao Amharic gado idia herevalaia taudia momo idia durudia totona. Unai gabu ena kastom bona kara haida ia herevalaia, bona reana idia be oiemu gabu ena kastom amo idia idau. Edia kastom karadia do oi hoalaia. To ena be emu kastom be idau, inai hereva be do oi gaukaralaia diba Baibel sisiba namodia ia herevalaia danu.

“KERISTEN edia Headava Negadia ese Moale Idia Mailaia” be Gima Kohorona, January 1, 1985, ena stadi hereva namona ta ena kwarana. Unai hereva murinai be inai hereva ladana “Headava Aria edia Moale Kara Namodia.” (Idia ura idia headava taudia totona sisiba namodia haida be Emu Ruma Bese Hamoalea Dalana, karoa 2 lalonai, bona Memero Kekeni​—⁠Moale Umui Davaria Dalana, ena karoa 19 bona 20 lalonai idia davaria diba.)a Unai hereva idia halasidia murinai taunimanima momo be Iehova ena Witness taudia ai idia lao, unai dainai ita ura iseda gabu dekenai ita gaukaralaia diba gaudia bona hereva badadia ma haida, ita idia durua headava negadia amo headava ia Hamatamaia Tauna, Iehova, do idia hanamoa diba herevadia, do ita riviulaia.

Ita lalohadailaia guna henanadai ta be, Edena negai headava do idia karaia? Headava ena deiti be kastom dalanai idia abia hidi headava negadia edia dina ta ai idia karaia be maoro, a? Hanua taudia edia kastom be bema nega ma ta ai idia karaia headava do ia heau namonamo lasi. Unai be gari hereva kavakavana ta sibona, badina idia headava vadaeni taudia momo, idia moale bona nega tamona Iehova idia hesiai henia noho taudia, be kastom headava dinana ta ai idia headava lasi. Ita be laki karana ita abidadama henia lasi. (Isaia 65:11; Kolose 2:⁠8) Bema iseda headava dinana ena deiti be kastom hegeregerena ai ita abia hidi, iseda murimuri varavaradia do ita durudia lasi koikoi bona hereva momokani edia idau idia diba totona. Keristani taudia be edena hua lalonai idia ura idia headava be idia headava diba.

Gavamani dekenai idia rejista murinai bema headava hereva idia ura idia karaia danu, aonega dalana be unai gaukara rua huanai nega bada do ia hanaia lasi. Bema headava taudia idia ura Kingdom Hall dekenai headava hereva idia karaia, namona be nega bada ia do noho lalonai kongregesen elda taudia do idia hereva henidia Kingdom Hall idia gaukaralaia totona. Kongregesen elda ese do idia hamomokania headava hebou totona idia hegaegaelaia karadia be maoro bona edia lalona be ia hegeregere. Kongregesen ena gaukara idauidau do ia koua lasi negana do idia abia hidi. Headava hereva do ia henia tadikakana ese do idia headava tau bona hahine ida do ia hedavari bona heduru sisiba do ia henidia bona do ia tahua kara bodaga ta ia vara lasi bona idia headava totona koua taravatu ta be lasi bona ia ese gabeai do idia karaia aria gaukarana ia abia dae. Headava hereva ena lata be miniti 30 bamona bona hemataurai dalanai do ia henia, mai anina bada lauma gaudia do ia herevalaidia. Headava herevana be mai anina bada, gabeai idia karaia aria ena anina ia hanaia.

Keristani headava negadia be nega namodia do ita hahedinaraia “ita be tanobada ena lasi.” (Ioane 17:14; Iamesi 1:27) Namona be dala maorona ai gau ibounai ita karaia karana ia hedinarai. Unai ena anina be gau ibounai be nega korikorina ai do ita karaia, namo lasi taunimanima be ita idia naria, bona kongregesen gaukara ma ta ena nega ita hadikaia. Do ia headava hahinena ese unai ia badinaia be namo, badina murimuri varavaradia ese do idia doria ia leiti totona​—⁠reana ia ura do ia hahedinaraia ia be ladana bada hahinena. Keristani lo taihu be nega korikori ai ia ginidae neganai, ia hahedinaraia lauma karadia hegeregere manau bona haida lalodia guna be mai anina bada ia dekenai! Danu, bema piksa abia tauna ta idia boiria piksa ia abia totona, dala maorona ia badinaia be gau badana. Piksa abia tauna ese jeket, neketai, bona piripou namona ia hahedokilaia be namo bona hereva idia henia noho lalonai piksa do ia abia lasi. Guriguri lalonai piksa do ia abia lasi. Dala maorona ai gau ibounai ita karaia ese Iehova do ia imodaia bona eda toana namona ia hahedinaraia. Tanobada taudia edia dala ita badinaia be anina lasi badina unai ese headava ena anina korikorina ia hunia.

Aria be gau badana lasi headava ta ia kwalimu totona, to Baibel ese unai moale bada negana ia taravatua lasi. To, Keristani korikori taudia edia headava aria be tanobada taudia edia amo ia idau. Edia aria dekenai moni bada idia negea, idia inuinu kekero, idia aniani bada, regerege bada miusiki idia gadaralaia, lebulebu mavaru idia karaia bona idia heai danu. Baibel ese “lebulebu” karadia ia gwauraia tauanina ena kara ta. (Galatia 5:21) Taunimanima be momo lasi neganai, naria dala be auka lasi. Kastom karadia hegeregerena palai rumana ta haginia be anina lasi. Bema medu eiava gabu be hegeregere lasi dainai ta ese palai rumana ia haginia, unai be sibona ena ura.

Headava gunadia momo ese ia hahedinaraia bema ta ia ura aria dekenai idia mai taudia edia namba be ia maragi, pepapepa idia siaia idia boiria taudia sibodia dekenai. Aonega karana be taunimanima ta ta ita boiridia, kongregesen ibounai lasi. Ita be gau ibounai ita karaia goevagoeva Keristani taudia dainai, bema ta be taunimanima momo lasi ia boiria, unai ita matauraia be namo. Pepapepa amo taunimanima ita boiria karana ese ita ia durua dainai, murimuri idia atoa tauna be aria dekenai do ia mai lasi. Badina bema ia mai, reana tadikaka bona taihu momo be aria do idia rakatania. (1 Korinto 5:​9-11) Bema headava tau bona hahine ese murimuri varavara eiava diba taudia idia boiridia, idia be momo lasi badina idia ese ‘abidadama tamona taudia’ idia lalodia bada. (Galatia 6:10) Haida be edia lalona idia hadaia edia diba taudia eiava murimuri varavaradia be headava ena hereva sibona dekenai idia boiridia. Dahaka dainai? Badina be headava aria haida dekenai murimuri varavara taudia ese hemarai karadia idia karaia bona tadikaka bona taihu momo idia laloa idia noho be hegeregere lasi. Headava taudia haida be aniani maragina sibona idia hegaegaelaia edia famili bona edia Keristani turadia sibona ida idia abia totona.

Ioane 2:​8, 9 hegeregerena, aonega karana be “Aria biaguna” do idia abia hidi. Headava tauna ese ia abidadama henia Keristani tauna do ia abia hidi, ia ese aria be dala maorona bona goevana ai do ia haheaua totona. Turadia ese harihari gaudia idia mailaia neganai, namona be “hekokoroku” dalanai idia mailaia lasi. (1 Ioane 2:16) Miusiki be ia goeva bona hereva mirodia be lasi, bona ia regerege bada lasi neganai, ita moalelaia diba. Momo idia davaria dala namona be elda ta ese do idia gadaralaia miusiki ia kamonaia guna. Mavaru ese hetoho momo ia havaraia diba, sene mavaru momo be natudia havaraia siahuna ena mavaru amo idia abia bona hegahusi mavaru idia karaia. Nega haida tanobada taudia be “keke utua bona champagne negana” idia gaukaralaia idia lebulebu totona. Keristani headava taudia momo be unai bamona hekwakwanai idia dadaraia totona, headava aria dekenai kekero muramuradia idia atoa lasi.

Iseda ura be Iehova ena ladana do ita abia isi dainai, namo lasi iseda kohu ita heagilaia haida ese ita idia itaia totona. Tanobada taudia edia magasin danu be momo ese idia badinaia matana veria karadia ia gwauraia dika. Ia be aonega karana lasi bema headava taudia be abitorehai idia karaia edia headava negana idia lebulebulaia totona bena gabeai lagani momo lalodiai idia lalohisihisi badina unai dina tamona dekenai idia karaia gaudia edia abitorehai davana idia henia lou! Dirava idia tomadiho henia taudia edia kara hegeregerena, headava dinana ai mai hemataurai ida dabua goeva idia hahedokilaia be namo. (1 Timoteo 2:​9, 10) Hereva ta ladana, “Christian Weddings Should Reflect Reasonableness” (The Watchtower, January 15, 1969 gauna) ese inai mai anina bada hereva ia gwauraia, ia gwau:

“Ta ena headava dinana be mai anina bada negana, unai dainai do idia moale bona edia toana be hairai do idia laloa bada. To unai ena anina be ta ese deresi idauna eiava siedi bona piripou idauna do ia hahedokilaia lasi. Ta ese unai gabu dekenai idia karaia dabua toadia, ena davana bona ia sibona ena sitailo do ia laloa. . . . Ia be aonega karana bema idia ese dava bada dabua idia hoia bona idia sibodia eiava ma haida dekenai moni hekwakwanai idia havaraia, a? . . . Headava hahine haida ese edia turana namona eiava varavara ta ena headava dabua idia gaukaralaia. Haida be moale bada idia davaria sibodia edia headava dabua idia turia neganai, reana unai dala amo unai dabua be ma nega ta ai idia gaukaralaia diba. Bona headava taudia be headava dinana ai edia dabua namona ta idia hahedokilaia diba, unai be kerere lasi . . . Haida edia moni be ia hegeregere headava dekenai gau momo idia karaia totona to idia ura ‘gau momo idia reaia’ badina metau dikadia momo ena negai ita noho.”

Unai hegeregerena, headava tau bona hahine badinai idia gini taudia danu (tau ena turadia bona hahine ena turadia) be idia momo lasi be namo. Namona be idia ura lasi edia dabua eiava edia kara dainai taunimanima ese idia raraidia momo. Ena be murimuri dekenai idia atoa tauna be Kingdom Hall dekenai ia mai diba headava herevana totona, to Gima Kohorona, January 1, 1985 gauna ia gwau: “Headava matamata taudia idia ura lasi orea amo idia atoa siri taudia eiava Bible ena taravatu idia utua noho taudia idia abia hidi.”

Ena be Iesu be headava aria ta dekenai ia lao, ita diba ia ese motuka momo be mai edia regerege bada ida taoni dekenai idia heau loaloa karana do ia abia dae lasi; headava lao taudia ese edia motuka edia kibi regena idia karaia dainai pulisi ese motuka taria taudia haida idia fainia vadaeni. (Mataio 22:21 itaia.) Unai kara iboudiai lalonai, namo lasi tanobada taudia edia lebulebu o edia kara idia tohotohoa, Keristani taudia ese aonega idia hahedinaraia, manau taudia hegeregerena.​—⁠Aonega Herevadia 11:⁠2.

To dekena taudia, murimuri gaukara taudia, o varavara eiava diba taudia edia headava dekenai ta ia lao be edena bamona? Keristani taudia ta ta ese inai kara dekenai sibona ena lalona do ia hadaia. Namona be ita laloatao iseda nega be mai anina bada, badina ita gaukaralaia haroro gaukara dekenai, siboda eda stadi totona, bona ruma bese bona kongregesen gaukara dekenai. (Efeso 5:​15, 16) Saturday bona Sunday ai, ita be mai eda hebou bona haroro gaukara bona ita ura lasi unai ita reaia. (Heberu 10:​24, 25) Headava momo be hebouhebou eiava Lohiabada ena Anibou dainai idia hegaegaelaia haroro gaukara ena nega dekenai idia karaia. Namo lasi unai headava ita laloa bada bona Lohiabada ena Anibou dekenai ita lao totona ita hekwarahi lasi, tanobada hegegemadai iseda tadikaka idia hekwarahi bada bamona. Hereva momokani ita dibaia lasi neganai, reana nega bada be tanobada taudia danu ita haorea, reana Dirava matauraia lasi karadia dekenai. (1 Petero 4:​3, 4) Hari ita laloa bada gaudia be idau. Murimuri headava matamata taudia dekenai kadi amo hanamoa herevana ita siaia diba eiava ma nega ta ai nega sisina lalonai ita vadivadi henidia diba. Haida ese unai bamona negadia idia gaukaralaia idia haroro totona, Baibel siri namodia haida headava taudia totona idia duahia hebou.

Headava dinana ai gaukara ibounai lalonai be lauma gaudia idia laloa bona tanobada taudia edia kara idia dadaraia neganai, unai ese Iehova ena ladana ia abia isi. Keristani taudia be tanobada mai ena babalau karadia bona lebulebu karadia amo idia siri momokani, bona edia tiokratik gaukara ia hadikaia lasi, bona lebulebu lasi to manau idia hahedinaraia neganai, idia ese headava negana do idia moalelaia. Unai sibona lasi, to headava negana do idia laloatao mai edia lalo-goeva bona moale ida. Namona be iseda Keristani headava dinadia ibounai be mai aonega bona lalo-maoromaoro ida ita karaia, kudou maoro taudia dekenai haheitalai namona ia hahedinaraia totona.

[Footnotes]

[Picture on page 24]

Keristani taudia be edia hanua ena headava kastom iboudiai idia badinaia kava lasi