‘Dirava be Egu Heau Mauri Gabuna’
HARI inai “metau dikadia momo” negana ai, hetoho bona lalona veria karadia idia bada idia lao. Hegeregere, eda koikoi lasi karana be gaukara gabuna ai idia tohoa diba. Iseda goeva karana be sikuli turadia ese idia tohoa diba. Bona eda kara maoromaoro be nega momo inai kara gageva tanobadana ese ia hamanokaia toho.—2 Timoteo 3:1-5.
Baibel torea tauna Asapa be kara dika ia bada herea negana ta ai ia noho danu. Iena nega taudia haida be edia Dirava badinaia lasi karadia idia heagilaia. Asapa ia gwau: “Hekokoroku idia atoa, ageva idia atoa bamona, bona dagedage idia karaia noho, dabua idia karaia bamona. Idia ese tau haida idia kirikirilaia mai hevaseha danu, badu herevadia danu idia gwauraia noho. Idia be hekokoroku, bona dala idia tahua noho, tau haida do idia hadikaia totona.” (Salamo 73:6, 8) Unai bamona kara be hari oi itaia danu, a?
Kara maorodia idia ura karaia taudia ese unai bamona kara idia lalohisihisilaia, bona edia lalona ia hamanokaia diba. Asapa be mai taitai ida ia gwau: “Dina ibounai lau hisihisi noho, bona daba ibounai, . . . lau be hegeregere lasi laloa maoro do lau davaria.” (Salamo 73:14, 16) Oiemu hemami danu be reana unai bamona, to oi lalo-metau lasi! Asapa be iena nega taudia edia kara dikadia ia haheaukalaia, bona oi danu be unai bamona oi haheauka diba. To edena bamona?
Asapa ia lalo-parara goevadae lasi taudia edia lohia henunai, kara maoromaoro momokani ia davaria be auka. (Salamo 146:3, 4; Aonega Herevadia 17:23) Unai dainai ia ese ena nega, goada, bona ena kohu ia haorea lasi gwau-edeede kara dikadia ia kokia totona, to ia ese ena hetura karana Iehova ida ia laloa bada. Asapa ia gwau: “Lau be Dirava badibadinai lau noho. Inai be namo herea momokani. Siahu Ibounai Lohiabada e, oi be lauegu magu momokani.”—Salamo 73:28.
Hari inai negai, bisinesi kara gagevadia idia karaia taudia be nega momo kohu momo idia abia. Reana idia momo ese Dirava ena taravatu idia laloa lasi karana idia heagilaia. To idia be do idia noho daudau lasi. Asapa ia gwau: “Momokani oi ese dedidedi gabudia dekenai idia do oi atoa, bona mase gabuna dekenai idia do oi hamorua.”—Salamo 73:18.
Oibe, Dirava ena nega korikori ai, koikoi, dagedage, kara gagevadia, bona ma Dirava badinaia lasi karadia idauidau ibounai, hari Keristani taudia ese idia dadaraia karadia, be do ia haoredia. Baibel ia gwauhamata, ia gwau: “Kara dika taudia be, dika momokani do idia davaria, to Lohiabada idia abidadama henia taudia ese, edia tano dekenai do idia noho, mai namo danu.” (Salamo 37:9) To ita naria lalonai, namona be salamo torea tauna ena hereva ita laloa noho, ia gwau: “Lohiabada be egu Nadi Badana. Ia be egu magu, bona egu hamauria Tauna. Egu Dirava be egu kohoro, lau heau mauri gabuna.”—Salamo 18:2.