Basileia Haroro Ripoti

“Nadi Namo Herea” ta Ia Davaria

“GUBA Basileia be hoihoi tauna ta bamona, davana bada nadi namodia ia tahua. Nadi namo herea ta ia davaria, vadaeni ia lao, iena gau ibounai ia hoia lao, unai nadi namo herea ia hoia.” Unai hereva amo Iesu ese ia haheitalaia Dirava ena Basileia ena namo be hereadae. (Mataio 13:​45, 46) Nega momo Basileia ena namo idia lalo-pararalaia taudia be edia ura gaudia idia dadaraia Basileia idia abia totona. Unai ia haheitalaia ekspiriens ta ia vara Pingtung County, Taiwan dekenai.

Lagani 1991 ai, Mr. bona Mrs. Lin be Baibel idia stadilaia matamaia Iehova ena Witness taudia ida. Unai gabu ena pasto tauna ese ia kamonaia neganai, ena dubu dekenai idia lao totona ia doria toho. To Lin taudia edia bisinesi be boroma bona daki manu edia rara hoihoilaia maketi dekenai, bona idia laloa unai pasto do idia nanadaia ena lalohadai unai kara dekenai be dahaka. Ia haere, “Dirava ia karaia gaudia ibounai idia hegeregere taunimanima edia aniani totona.” To Witness taudia be idau, idia hagoadadia namona be Dirava ena Hereva idia laloa guna. Idia dibaia Iehova Dirava ia laloa rara be helaga, badina “mauri gauna ena mauri be rara.” (Levitiko 17:​10, 11, The New English Bible) Unai dainai Keristani momokani taudia ese ‘rara idia dadaraia.’ (Kara 15:​20, NW) Baibel ena hereva idia tahua dainai, Lin taudia idia abia hidi rara hoihoilaia karana do idia hadokoa, ena be unai be edia moni abia dalana badana. Daudau lasi murinai, hahetoho badana ma ta ia vara idia dekenai.

Hereva momokani idia do dibaia lasi neganai, Lin taudia ese buatau audia 1,300 idia hadoa edia tano dekenai. Lagani ima lalonai do idia tubu bena idia lo neganai moni bada herea do idia abia. Lin taudia idia diba lagani ta ta K103,180 do idia abia diba. Gogoa negana ginigunana ia kahirakahira neganai, Lin taudia idia diba mai anina bada abia hidina do idia karaia be namo. Edia Baibel stadi amo idia dibaia Keristani taudia ese ‘tauanina bona lauma hamiroa karadia ibounai idia hadokoa’ be namo, ena anina be miro karadia, hegeregere kuku ania, drag ania kava, bona buatau ania karana idia rakatania be gau badana. (2 Korinto 7:⁠1) Dahaka do idia karaia?

Ena lalona ia hisihisi dainai, Mr. Lin be ena stadi ia hadokoa. Unai nega lalonai, Mrs. Lin ese buatau uhedia haida, idia bada vadaeni audia amo, ia hoia bona K4,020 ia abia. Unai ese ia hahedinaraia moni bada herea do idia abia bema edia au idia utua lasi. To, Mr. Lin ena lalona ese ia botaia noho.

Unai gauna ia lalo-hekwarahilaia noho ela bona dina ta ai Witness taudia ia noia bema ena buatau audia do idia utua diba ia totona. Unai Witness taudia ese idia hamaoroa unai be iena maduna; namona be ‘ia sibona be ena metau do ia huaia’ bona ia sibona ese unai au ia utudia be namo. (Galatia 6:​4, 5) Idia hagoadaia 1 Korinto 10:​13 ena gwauhamata ia laloaboio lasi totona, ia gwau: “Umui dekenai idia pidia dibagani ibounai ese taunimanima ibounai dekenai danu idia pidia noho. To Dirava be ia momokani. Ia ese umui do ia naria, emui goada ia hanaia dibagani ese umui do ia pidia garina. Bona dibagani ia mai neganai, emui dala ta do ia kehoa. Vadaeni inai dala dekena amo unai dibagani dekena amo do umui kwalimu diba.” Witness taudia be ia ida idia herevahereva namonamo, idia gwau: “Bema ai ese emu audia ai utua oi totona, reana gabeai do oi lalohisihisilaia bona ai do oi badu henia, moni oi reaia dainai.” Daudau lasi murinai, au utua masini ena regerege ese Mrs. Lin ia hanogaia. Iena adavana bona iena natudia ese buatau audia idia utua noho!

Mr. Lin ia davaria Iehova be Ena gwauhamata hegeregerena ia kara. Iena lalona ia hadikaia lasi gaukarana ia davaria, bena Iehova hanamoa tauna ai ia lao diba. April 1996 ai, Iehova ena Witness taudia edia sekit hebouhebou dekenai bapatiso ia abia.

Oibe, Mr. Lin be “unai nadi namo herea ia hoia” totona, “iena gau ibounai ia hoia lao.” Hari hahenamo namo hereadaena ta ia abia, Iehova Dirava ia tura henia bona Iena Basileia hesiai gaukarana ia karaia diba.