Mauri Ena Dala Dekenai Oi Ia Hakaua Lamepa
“LOHIABADA e, lau diba taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho.” (Ieremia 10:23) Unai hereva amo peroveta tauna Ieremia ia hahedinaraia taunimanima be heduru idia abia lasi neganai mauri ena dala idia naria namonamo diba lasi. Edeseni amo unai heduru idia davaria diba? Salamo torea tauna ese haere ia henia, Iehova Dirava dekenai ia guriguri neganai, ia gwau: “Lohiabada e, oiemu hereva be lamepa bamona, lau ia hakaua noho, vadaeni lau raka maoromaoro diba. Oiemu hereva be diari, ia ese egu dala ia hadiaria noho.”—Salamo 119:105.
Dirava ena Hereva, Buka Helagana, Baibel, idia stadilaia taudia be idia dibaia gaudia idia badinaia neganai, idia be hegeregere tau ta be daba maragi ai gabu daudauna dekenai ia laolao bamona. Matamanai, ia do dibura dainai gabu ia itaia namonamo lasi. To dina ia daekau matamaia neganai, ia ese gabu momo ia itaia diba. Bena, dina be ia daekau ela bona guba ena huanai ia noho. Ia ese gau ibounai edia toana ia itaia namonamo diba. Unai haheitalai be Baibel ena aonega herevana ta bamona: “To kara maoromaoro taudia idia raka noho dalana, be daba rere bamona. Edia dala ena diari be ia bada lao noho, ela bona dina tubua momokani ia hedinarai.”—Aonega Herevadia 4:18.
To Dirava ena hakaua dalana idia dadaraia taudia be edena bamona? Baibel ia gwau: “Kara dika taudia edia dala, be dibura masemase bamona. Idia be idia moru noho, to idia hekwakwanai gauna idia itaia diba lasi.” (Aonega Herevadia 4:19) Oibe, kara dika taudia be dibura dekenai ia raka namonamo lasi tauna bamona. Edia mauri lalonai idia kwalimu gaudia danu be nega sisina sibona gaudia, badina “taunimanima edia aonega, edia laloa kehoa, bona edia sisiba ese, Lohiabada ena ura do idia koua diba lasi, lasi momokani.”—Aonega Herevadia 21:30.
Unai dainai, Dirava ena Hereva, Baibel, ena hakaua herevadia oi badinaia. Bema unai bamona oi karaia, do oi itaia Aonega Herevadia 3:5, 6 ena hereva ia momokani, ia gwau: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.”