Mahuta Hebou Lasi Headavana ta, A?

MARIA be tau ta ida ia mahuta lasi ela bona ia mase lalohadaina bona Iosepa ia adavaia karana idia hahegeregerea totona, laulau penia bona laulau koroa taudia ese Iosepa ena toana idia karaia neganai ena toana be ia buruka momokani. Idia laloa Iosepa be Maria ia naria tauna bamona to ena adavana momokanina lasi. To vanegai Pope John Paul Iharuana ese lalohadai idauna ta ia gwauraia. Ia gwau unai neganai Iosepa “be buruka tauna ta lasi.” To, “iena lalona goevadaena, Dirava ena harihari bada gauna, ese ia durua ena adavana Maria danu ia noho mai lalokau ida, to idia mahuta hebou lasi.”

Bema Maria ena palani be tau ta ida do ia mahuta hebou lasi, dahaka dainai ia maoheni? Pope ia haere, ia gwau: “Reana ita gwau diba idia maoheni neganai, Iosepa bona Maria idia herevahereva hebou bona idia diba vadaeni Maria ena palani be do ia rami-hebou noho.”

To, Baibel ena hereva be idau. Mataio ena buka ia gwau Iosepa “be Maria danu idia mahuta hebou lasi, ela bona natuna merona ia vara.” (Mataio 1:​25, Katolik New American Bible) Iesu ia vara murinai, headava taudia Iosepa bona Maria idia mahuta hebou, ia rami-hebou noho lasi. Unai ia hamomokania gauna ta be unai Evanelia bukana ia hahedinaraia Iesu be mai ena tadina bona taihuna haida danu.​—⁠Mataio 13:​55, 56.

Unai dainai, ena be Baibel ia gwau Iesu ia vara neganai Maria be rami-hebou kekenina, to badina ta ia noho lasi ta ia gwau diba Iosepa ida ia be rami-hebou kekenina bamona ia mauri ela bona ia mase.