Taravatu Ten

GLOUCESTER ena bisop England ai, ia davaria ia naria gabuna dekenai ena dubu gunalaia taudia hani hani amo sedira rua rua be Taravatu 10 idia gwauraia diba lasi, bona idia amo 10 pesen be idia diba lasi Baibel lalonai edeseniai do idia davaria. To unai be lagani 450 gunanai. Unai nega amo ia namo ia lao, a? Lasi—vanegai Sunday Times niuspepa ese Anglikan dubu gunalaia taudia ia henanadai henidia ena ripoti ese ia hahedinaraia bamona.

Idia henanadai henidia haroro taudia 200 amo, 34 pesen sibona be Taravatu 10 ibounai idia gwauraia diba. Haroro taudia oredia amo ta ia laloa gau momo herea idia taravatua, bona ma ta ia gwau idia be hegeregere lasi inai nega ena kara maoromaoro badinaia lasi karana ena hekwakwanai durua totona.

Unai Taravatu 10 oi diba eiava idia torea gabuna oi diba, a? Idia be Esodo dekenai idia torea, Baibel ena buka iharuana, karoa 20 ena siri ginigunadia 17 lalonai. Oi duahidia be namo, ani? Idia oi haboua dalana namona ta be inai. Ginigunadia 4 be iseda tomadiho karana Dirava dekenai idia herevalaia, namba 5 be ruma bese maurina ia hahedinaraia, namba 6 ia lao 9 be iseda kara ma haida dekenai idia herevalaia, bona namba 10 be idau, ita ia durua iseda kudouna ita tahua, iseda kara ena badina ita tahua namonamo totona. Reana inai dala kwadogina amo Keristani taudia ese unai hakaua herevadia idia badinaia diba.

Namba 1: Ita ia Havaraia Tauna sibona ita tomadiho henia. Namba 2: Iseda tomadiho karana lalonai kaivakuku ita gaukaralaia lasi. Namba 3: Hanaihanai Dirava ena ladana ita matauraia bona ita hanamoa. Namba 4: Nega ita atoa lauma gaudia ita laloa totona, gau ta ese iseda lalona do ia veria lasi be namo. Namba 5: Natudia e, emui tama sina umui matauraia. Namba 6: Oi ala-ala lasi. Namba 7: Heudahanai oi dadaraia. Namba 8: Oi henaohenao lasi. Namba 9: Hereva momokani oi gwauraia. Namba 10: Mama oi dadaraia.

Taravatu 10 be Dirava ese Mose dekenai ia henia taravatu momo ena kahana ta. To edia hakaua herevadia ese hanaihanai namo idia havaraia. (Roma 6:​14; Kolose 2:​13, 14) Unai dainai, Iesu murinai idia raka taudia ese unai Taravatu 10 ena hereva idia gwauraia bona idia herevalaia. (Roma 13:​8-​10) Hari inai negai, mauri ita moalelaia—bona dika ia vara lasi—bema taunimanima ibounai be Dirava ena lauma amo ia havaraia hakaua herevadia idia matauraia bona idia badinaia!