Golo Rini amo Sibona Hahairaia

GUNAGUNA amo ema bona hari, golo amo idia karaia herahera gaudia be edia davana bona hairai dainai idia laloa bada. Aigupito ena praiminista ai ia lao neganai, Iosepa be Farao amo golo ageva ta ia abia. (Genese 41:42) Udu baubau ena golo rini bona golo gana badadia rua, hari inai negai edia davana be 1,400 dola, be Rebeka dekenai idia henia. (Genese 24:22) Ita daradara lasi, unai dava bada harihari gaudia idia abia dae mai edia tanikiu ida bona idia kwatua mai edia moale ida.

Baibel ese Iosepa bona Rebeka idia karaia gaudia edia davana idia hanaia momokani herahera gaudia ia herevalaia. Aonega Herevadia 25:12 ia gwau: “Bema aonega tauna ena sisiba hereva, be tau ta ese ia kamonai henia neganai, unai hereva be golo rini o golo herahera gauna ta bamona.” Sisiba henia tauna be sibona ena lalohadai lasi to Dirava ena Hereva amo sisiba ia henia neganai, ia be dava bada harihari gauna ia henia. Dahaka dainai? Badina unai bamona sisiba be Iehova sibona amo ia mai. Baibel ese ita ia hamaoroa: “Egu natuna e, Lohiabada ena matakani oi dekenai, be do oi abia dae, bona iena sisiba dekenai do oi hesiku lasi. Badina be Lohiabada ese ia lalokau henia taudia, be ia matakani henidia noho, tamana ta ese iena natuna, ia lalokau henia merona, ia matakani henia bamona.” (Aonega Herevadia 3:11, 12) Kamonai tauna be mai manau ida sisiba ia abia dae bona ia badinaia neganai, ia be golo rini amo sibona ia hahairaia bamona. Ia be Baibel lalonai ia noho Dirava ese ena lauma amo ia havaraia aonega herevana hegeregerena, ia gwau: “Aonega ia davaria tauna be mai moale danu. Ia ese lalona kehoa ia davaria vadaeni. Badina be aonega ena namo ese, siliva ena namo ia hereaia, bona aonega ena davana ese, golo ena davana ia hereaia.”—Aonega Herevadia 3:13, 14.