Inai Oi Laloatao, A?

Vanegai idia halasia Gima Kohorona magasin edia hereva be mai moale ida oi duahia, a? Vadaeni, mani oi tohoa bema inai henanadai oi haerelaidia diba:

◻ Edukeisini ena badina badana be dahaka Keristani matamata taudia dekenai?

Edukeisini ena badina badana be matamata tauna ia durua Iehova ena hesiai tauna namona ai do ia lao. Bona unai totona ita abia diba mai anina bada edukeisini be lauma dalanai ita abia.​—8/15, rau 21.

◻ Dahaka dainai Keristani tauna ta ena kara kerere badana ita ripotilaia elda taudia dekenai?

Kara kerere badana ita ripotilaia ena badina ta be kongregesen ia goeva noho totona. Badina ma ta be, unai bamona ita karaia neganai, Dirava dekenai, kongregesen dekenai, bona ia kara kerere tauna dekenai Keristani lalokau korikorina ita hahedinaraia.​—8/15, rau 28, 30.

◻ ‘Iehova ena dina ita laloa bona naria noho’ ena anina be dahaka? (2 Petero 3:​12)

Ena anina be iseda lalona dekenai ‘Iehova ena dina’ naria karana ita hadokoa lasi. Namona be ita laloaboio lasi Iehova ese inai tanobada ena oromana do ia hadikaia dinana be kahirakahira. Namona be ita dekenai ia be momokani dainai ia ita itaia goevagoeva diba, ita vairanai ia noho bamona. (Sepanaia 1:​7, 14)​—9/1, rau 19.

◻ Dahaka dainai inai tanobada ena nega dokona ena daudau be momo idia laloa negana ena daudau ia hanaia?

Iehova ese taunimanima ibounai edia namo ia laloa. Ia laloa bada gauna be taunimanima edia mauri. (Esekiela 33:11) Ita diba momokani dokona be iseda aonega bona lalokau Havaraia Tauna ena ura hagugurua negana korikorina ai do ia vara.​—9/1, rau 22.

◻ Ful-taim hesiai gaukarana idia karaia taudia be edena bamona idia moale noho diba ena be hekwakwanai idia davaria?

Namona be idia abia vadaeni hahenamo momo idia laloa bona namona be idia lalo-parara ma taunimanima tausen momo edia hekwakwanai ese idia davaria hekwakwanai idia hanaia. (1 Petero 5:​6-9)​—9/15, rau 24.

◻ William Tyndale be Baibel ia hahanaia neganai, ena tahua gauna be dahaka?

Tyndale ena ura be taunimanima ese hereva maorodia bona auka lasi herevadia ai Baibel do idia abia.​—9/15, rau 27.

◻ Edena bamona ita hahedinaraia ita be Dirava ena Hereva ita badinaia namonamo taudia?

Ita hahedinaraia ita be Dirava ena Hereva badinaia namonamo taudia bema ma haida dekenai ita harorolaia mai iseda goada ida. Ita be hadibaia taudia dainai, namona be Baibel ita gaukaralaia namonamo, ena hereva ita hagagevaia lasi bona iseda lalohadai ia durua totona ita habadaia lasi. (2 Timoteo 2:​15)​—10/1, rau 20.

◻ Tanobada ena lauma be edena bamona iseda Dirava badinaia auka karana ia hamanokaia diba?

Tanobada ena lauma ese iseda Dirava badinaia auka karana ia hamanokaia diba dalana be, ita ia koia iseda mauri gaudia ita moalelaia lasi totona, bona ita do ia veria sibona eda dabu gaudia bona ura gaudia ita atoa guna totona, bona Dirava ena ura be gabeai ita atoa. (Mataio 16:21-23 itaia.)​—10/1, rau 29.

◻ Mai iseda kudouna ibounai ida Iehova ita hesiai henia ena anina be dahaka?

Mai eda kudouna ibounai ida ita gaukara ena anina be sibona ita henia, iseda diba bona iseda goada ibounai be Dirava ena hesiai gaukara lalonai ita gaukaralaia badabada. (Mareko 12:29, 30)​—10/15, rau 13.

◻ Dirava ena hakaua herevadia badinaia tauna ai oi lao totona, dahaka be gau badana?

Gau badana be Iehova ena ura, bona ia ura henia bona ia inai henia gaudia oi dibaia. Unai diba Dirava ena hakaua herevadia dekenai ese iseda mauri ia biagua neganai, unai hakaua herevadia be idia mauri noho bamona. (Ieremia 22:16; Heberu 4:​12)​—10/15, rau 29.

◻ Dahaka lalohadai maorona be Iehova ena hesiai taudia idia abia taunimanima edia lohia siahuna dekenai?

Politikol karadia lalonai idia vareai lasi, badina idia be Dirava ena Basileia ena gwaukau taudia. (2 Korinto 5:​20) To, gavamani edia siahu taudia idia kamonai henidia mai edia lalo-goeva ida.​—11/1, rau 17.

◻ Peroveta tauna Elisaia ena kara amo, dahaka ita dibaia?

Elia danu gaukara bada do ia karaia totona Elisaia idia boiria neganai, maoromaoro ena uma gabu ia rakatania Elia ia hesiai henia totona, ena be ena gaukara haida be maragi. (2 King Taudia 3:​11) Hari, Dirava ena hesiai taudia haida be unai bamona sibona edia ura idia dadaraia karana idia hahedinaraia bona, edia gaukara idia rakatania, idau gabu dekenai sivarai namona idia harorolaia totona.​—11/1, rau 30.

◻ Iamesi ena revareva lalonai dahaka sisiba namodia idia noho?

Hetoho haheaukalaia dalana ia hahedinaraia ita dekenai, haida sibona kara namo henia karana ia sisibalaia, bona ita ia ha-uraia kara namodia ita karaia totona. Iamesi ese ita ia hamaoroa iseda malana ita biagua, tanobada ena lalohadai ita dadaraia, bona maino ita habadaia be namo. Danu iena hereva ese ita do ia durua diba do ita haheauka bona ita guriguri loulou.​—11/15, rau 24.

◻ Dahaka dainai Iehova be ‘kara dika ia gwauatao’? (Salamo 86:5)

Iehova be kara dika ia gwauatao badina ia laloaboio lasi ita be kahu sibona, bona ita goevadae lasi dainai ita manoka. (Salamo 103:​12-​14)—12/1, rau 10, 11.

◻ Dahaka dainai ma haida edia kerere ita gwauatao be namo?

Bema badina namona ia noho ma ta dekenai hebogahisi ita hahedinaraia bona ena kerere ita gwauatao totona, to unai kara ita dadaraia, iseda hetura karana Dirava ida ia hadikaia diba. (Mataio 6:14, 15)—12/1, rau 17.