“Bese Iboudiai Taudia be Hahediba Taudia ai Do Umui Halaoa”
“UNAI dainai do umui lao bona bese iboudiai taudia be hahediba taudia ai do umui halaoa, bona Tamana ena bona Natuna ena bona lauma helaga ena ladana ai idia do umui bapatisoa.” Unai be New World Translation Baibel ese Iesu ena hahegani Mataio 28:19 ai ia gwauraia dalana. To, unai dala idia gwauraia dika. Hegeregere, tomadiho taudia haida edia pepapepa ta, ia gwau: “Greek toretore hegeregerena idia hahanaia maoromaoro dalana tamona be inai: ‘Bese ibounai be hahediba taudia ai do umui halaoa!’ ” Unai be momokani, a?
Inai hereva, “Bese ibounai be hahediba taudia ai do umui halaoa” herevana, be Baibel momo lalonai ia noho bona unai be Greek herevadia hahanaia dalana maorona. Unai dainai inai hereva “bese iboudiai taudia be hahediba taudia ai do umui halaoa bona . . . idia do umui bapatisoa” idia torea ena badina be dahaka? Ia badinai idia noho siridia. Ita daradara lasi inai hereva “idia do umui bapatisoa” ese taunimanima ia herevalaia, bese ibounai ia herevalaia lasi. Germany ena aonega tauna Hans Bruns, ia gwau: “Unai [hereva] ‘idia’ ese bese ibounai ia herevalaia lasi (Greek gado ese unai ia hahedinaraia goevagoeva), to ia ese unai bese taudia ia herevalaia.”
Ma danu, Iesu ena hahegani idia badinaia dalana ita laloa be namo. Paulo bona Banaba edia haroro sivaraina Derebe, Asia Minor ena siti ta dekenai ena sivarai, ia gwau: “Hanua taudia momo be Iesu ena diba tahua taudia idia halaoa. Gabeai Lusitera bona Ikonio bona Antioka dekenai idia giroa lou.” (Kara 14:21) Oi itaia Paulo bona Banaba ese Derebe siti taudia ibounai lasi, to Derebe dekenai idia noho taudia haida be hahediba taudia ai idia halaoa.
Unai hegeregerena, Apokalupo bukana ese dokona negana ia herevalaia neganai ia gwau lasi bese ibounai be Dirava do idia hesiai henia, to ia gwau “hutuma bada herea . . . bese idauidau bona iduhu idauidau bona kopina idauidau bona gado idauidau amo” ese do idia hesiai henia. (Apokalupo 7:9, NW) Unai dainai, ita gwau diba New World Translation Baibel be ‘Dirava ena lauma amo ia havaraia’ herevana ia hahanaia maoromaoro.—2 Timoteo 3:16.