Haere Namona Idia Henia
BRITAIN ena Roman Katolik niuspepa ta, Catholic Herald, be vanegai Wales dekenai unai niuspepa ia duahia tauna ta ena revareva idia printaia: “Hanuaboi ta ai, Iehova ena Witness taudia rua be egu ruma dekenai idia mai. Lau gwau diba, Katolik Dubu ese idia gwauraia Taravatu Matamata ena hereva ia hamomokania. Lau hoa, badina idia ta be egu hereva ia abia dae. Ia gwau, ‘Oibe, umui gwauraia ia be momokani, to umui badinaia lasi. Iesu ia gwau, “umui ta ta umui lalokau henia, lau ese umui lau lalokau henia hegeregerena,” to umui ese umui ta ta umui alaia mase. Tuari badana iharuana lalonai, Katolik taudia ese Katolik taudia idia alaia mase, to Iehova ena Witness tauna ta lasi ese ma Witness tauna ta ia alaia mase.’ Edia hereva lau abia dae sibona. Edena bamona ita guriguri diba ‘Katolik lasi taudia’ ida do ita maino, bema ita huanai lalo-tamona momokanina be lasi? Ta ta alaia mase karana ita hamaoromaoroa guna be namo, ani?”—Ioane 15:12.
Lagani 1900 C.E. murinai idia vara tanobada ibounai tuaridia rua be Kerisendom lalonai idia matamaia bona taunimanima 50 milioni ia lao 60 milioni idia mase. To ita gwau diba, Iehova ena Witness taudia be unai tuaridia lalonai idia vareai lasi, bona hari idia vara tanobada ena hepapahuahu lalodiai idia vareai lasi. Edena bamona unai ia vara diba? Namo bada do oi davaria bema tanobada hegegemadai Iehova ena Witness taudia milioni ima mai kahana edia Keristani lalokau bona lalo-tamona oi tahua namonamo.—Isaia 2:4 duahia.
[Picture Credit Line on page 32]
U.S. National Archives photo