Idia Hereva Lasi to Edia Havaraia Tauna Idia Hanamoa

DINA ena diho be vaia mai hairaina. To Tuscany, Italy dekenai, Apuan Alps ororodia ta murinai dina ena diho ena toana be idau herea.

Gabu daudau amo oi raraia neganai, toana be hegeregere dina be unai ororo murinai ia diho lasi to ororo lalonai ia diho lao. Dahaka dainai? Badina unai ororo ena dorina be mai ena matu, toana be tau ta ese ia karaia bamona. Oibe, unai ororo dorina ese ladana maorona ia abia, Monte Forato​—Matu Ororona. Tanobada ese dina ia hagegea karana dainai, lagani ta ta lalonai nega rua sibona ai, unai matu idia raraia taudia ese idia itaia dina be Monte Forato lalonai ia diho bamona.

Dirava ese ia karaia gaudia ma haida hegeregerena, guba dekenai idia noho mauri lasi gaudia ese edia Havaraia Tauna idia hanamoa. Edena dala amo? Laulau namo hereana ese ia penia tauna ia hanamoa hegeregerena. Unai hegeregerena, guba gaudia ese Iehova ena siahu, aonega, bona hairai idia gwauraia. Salamo torea tauna ia hereva bamona, “guba ese Dirava ena hairaina ia hedinaraia, bona guba dekenai noho gaudia ese, Dirava ia karaia gaudia idia hedinaraia noho.” (Salamo 19:1; 69:34) Dina bona idia mauri lasi guba gaudia ese edia Havaraia Tauna idia hanamoa dainai, ita ese unai bamona ita karaia danu be namo!​—Salamo 148:​1, 3, 12, 13.