“Lalo-Tamona Bona Tadikaka Bamona Karana Ena Haheitalai” Ta
Ena famili lalonai ta ia mase ia lalohisihisilaia hahinena ese unai dala amo Iehova ena Witness taudia edia kara ia gwauraia. Ia gwau:
“Egu famili taudia bona lau, ai ura Witness taudia edia Italy gado kongregesen Freiburg, Germany dekenai, ai tanikiu henia. Egu kakana Antonio bona iena adavana, Anna, sibodia be Iehova ena Witness taudia, to egu famili orena be Witness taudia lasi. Nega daudau lalonai idia abia hidi tomadihona ai ura henia lasi, to ai matauraia.
“To hari, emai lalohadai ai haidaua. Momokani, guna ai diba lasi tadikaka bamona kara bona lalokau ai mamia.
“Madi, Anna be motuka aksiden dekenai ia mase. Ai be Italy dekenai ai noho dainai, egu kakana Antonio bona ena natudia ida nega sisina sibona ai noho diba. To ena Witness tadikaka ese idia durua. Ia ida idia noho karana amo, edia hereva amo, edia abidadama amo idia durua, bona gaukara haida idia karaia, idia hagoadaia, bona moni dalanai idia durua danu. Lau sibona lau lao bona kongregesen taudia lau tanikiu henia diba lasi dainai, lau ura emui magasin amo edia lalo-tamona bona tadikaka bamona karana ena haheitalai dainai lau tanikiu henidia, unai kara do ai laloaboio lasi.”
Unai hahine ena hereva ai laloa bada. Ia itaia hegeregerena, Iehova ena Witness taudia be tanobada hegegemadai tadikaka oreana. (1 Petero 2:17) Idia bogaraginai lalokau goadana idia hahedinaraia, badina idia diba lalokau ese “kara ibounai ia hereaia.” (Kolose 3:14) Ita ibounai dekenai idia vara diba nega dikadia lalonai danu, Iehova ena Witness taudia be edia Dirava bona iena taunimanima badinai idia noho.—Aonega Herevadia 18:24; Hadibaia Tauna 9:11; Ioane 13:34, 35.