Maria be Gorere o Buruka Dainai Ia Mase, A?

VATICAN ena niuspepa L’Osservatore Romano ena hereva hegeregerena, Katolik Dubu ena hadibaia herevana, Maria be guba dekenai ia daekau herevana unai, ia gwau: “Rami-Hebou Kekenina Goevadaena, kara dika ginigunana ena siahu ese ia hadikaia lasi, be ena tanobada maurina ia ore neganai, mai ena tauanina bona souli ida guba ena hairai dekenai ia daekau.” Unai niuspepa ia gwau, unai hahediba herevana dainai Katolik tomadiho stadilaia taudia haida idia gwau Maria be “ia mase lasi bona karaharaga tanobada maurina amo ia toreisi bona guba ena hairai dekenai ia lao.”a

Vanegai, Pope John Paul Iharuana ese hereva idauna ia gwauraia. June 25, 1997 ai, Vatican dekenai ia karaia General Audience hebouna dekenai, ia gwau: “Taravatu Matamatana ese Maria ena mase dekenai gau ta ia hereva lasi. Unai dainai ta ia laloa diba ia be gorere o buruka dainai ia mase, bona kara idauna ta ia vara lasi dainai idia gwauraia lasi. . . . Idia gwau ia gorere o ia buruka dainai ia mase lasi lalohadai be badina lasi.”

Pope John Paul ena hereva ese kerere badana ia hahedinaraia, Maria be sinana ena bogana lalonai ia tubu matamaia negana amo ia goevadae hahediba herevana dekenai. Bema Iesu ena sinana be “kara dika ginigunana ena siahu ese ia hadikaia lasi,” edena bamona Maria be “gorere o buruka” dainai ia mase diba, badina unai gaudia be Adamu ena kara dika dainai idia vara? (Roma 5:12) Unai hekwakwanai ia vara badina Katolik Dubu ena hahediba herevana Iesu ena sinana dekenai be ia maoro lasi. Ita hoa lasi unai hahediba herevana dainai Katolik Dubu lalonai taunimanima idia parara bona idia daradara.

Ena be Baibel ese ia hahedinaraia Maria be manau, kamonai bona abidadama hahinena, to ia gwau lasi Maria be ena sinana ena bogana lalonai ia tubu matamaia negana amo ia goevadae dainai, unai bamona karadia ia hahedinaraia. (Luka 1:38; Kara 1:​13, 14) Baibel be maoromaoro ia gwau: “Ita ibounai ita kara dika vadaeni, bona Dirava ena hairaina guba dekenai ita abia be hegeregere lasi.” (Roma 3:23) Oibe, Maria be taunimanima ibounai hegeregerena ena tama sina amo kara dika ia abia bona ia goevadae lasi, bona ia gorere o ia buruka dainai ia mase be gau ta ese ia hakoikoia lasi.​—⁠1 Ioane 1:​8-10 itaia.

[Footnote]