Basileia Haroro Ripoti
Mai Gari Lasi ida Sivarai Namona Oi Harorolaia
GABU matamata idia tahua loaloa Europe taudia be nega ginigunana Venezuela ena Gulf bona Lake Maracaibo dekenai idia lao neganai, uda gaudia amo idia karaia rumadia momo be kone dekenai idia itaia. Idia be du latanai, davara dekenai idia noho. Unai idia itaia neganai, Venice, Italy, idia laloatao, badina unai gabu dekenai taunimanima be ranu kahirakahira edia ruma idia haginia. Unai dainai Spain gado idia hereva taudia, gabu matamata idia tahua loaloa taudia unai, be unai gabu ena ladana idia hatoa Venezuela, ena anina be “Venice Maragina.”
Hari inai negai, unai tano hairaina lalonai, haginia gaukarana idauna idia karaia noho, ia be lauma gaukarana. Unuseniai Iehova ena Witness taudia be mai edia goada ida, nega namodia ibounai dekenai Basileia ena uhe idia hadoa. Unai gaukara amo, uiti ena anina abia negana lalonai, “uma ena biaguna,” Iehova Dirava, idia hanamoa bada.—Mataio 9:37, 38.
Sekit naria tauna ta be kongregesen ta, Zulia provinsi, Venezuela ena notwest kahana ai, ia vadivadi henia neganai, unuseniai idia noho Witness taudia ese dala idia hegaegaelaia ia bona ena adavana be kahirakahira ia noho motumotu maragina, ladana Toas, dekenai idia lao totona. Idia be ma haida ida, motumotu dekenai idia do ia abia lao bouti idia naria neganai, sekit naria tauna ena adavana, Mery, be ena bamona, ful-taim painia gaukara ia karaia taihuna, dekenai ia gwau namona be bouti dekenai idia gaukara taudia do idia haroro henia. Painia taihuna be ena hereva ia abia dae.
Mekaniki tauna idia hereva henia, bona Mery ese Diba Ese Mauri Dekenai Ita Ia Hakaua Lao bukana ia dekenai ia hahedinaraia. Ia ese “Dirava Ia Hanamoa Besena Haginia Dalana,” ena karoa ia hahedinaraia unai tauna dekenai bona toana be unai hereva ia laloa bada. Unai murinai, Mery be ia hadibaia, sibona ena ruma dekenai, unai buka dekenai Baibel stadi ia abia diba. Buka ia abia, bona idia hegaegae ta ese ena ruma dekenai ia do ia vadivadi henia totona.
Nega sisina murinai, unai gabu dekenai dina tamona hebouhebou idia karaia. Mery be unai mekaniki tauna, Senor Nava, bona ena adavana bona natuna kekeni matamatadia rua ia itaia neganai, ia hoa maragi lasi! Mery be unai tau ena adavana ia nanadaia dahaka ia laloa edia ruma bese ena Baibel stadi dekenai. Ena haere dekenai ia hoa.
Ia gwau: “Iehova lau tanikiu henia hereva momokani ai dibaia dainai.” Unai murinai ena hereva ena anina ia gwauraia hedinarai. Ia gwau: “Egu adavana oi hereva henia negana ai, lau ia rakatania vadaeni hahine ma ta ia abia totona. Danu ia inuinu kekero momo. Nega haida ia kekero neganai, ia hereva dika, bona unai motumotu maragina dekenai idia noho taudia be unai kara idia ura henia lasi. Meamea karadia ia karaia danu. To, Baibel stadi amo ia abia dibana ese egu adavana ia durua ena kara ia haidaua momokani totona. Ena kara dikadia ibounai ia rakatania vadaeni. Ena tama sina, Katolik taudia unai, be ena kara ia haidaua dainai idia moale bada. Idia moale badina hari ia be maduna ia huaia namonamo adavana bona tamana namona ta.”
Senor Nava be lagani 1996 lalonai bapatiso ia abia bona hari ia be ful-taim hesiai gaukara ia karaia. Ena adavana, Jenny, be lagani 1997 dekenai bapatiso ia abia. Unai taoni ena naria tauna badana ese unai bouti ena mekaniki tauna be ena kara ia haidaua ia laloa bada dainai, ia danu be Baibel stadi ia abia. Unai taihu rua be idia moale dikadika badina unai daba ai, ma haida ida unai bouti idia naria neganai, mai gari lasi ida sivarai namona idia harorolaia!
[Pictures on page 7]
Bouti ena mekaniki tauna ida sivarai namona herevalaia karana ese anina namona ia havaraia