Sinana Ena Lalokau Ia Hereaia Lalokauna

TREIN steiseni, mei rumadia, bona taunimanima momo idia loaloa daladia dekenai, sinadia ese edia beibi matamatadia idia negea. Nega haida, momoru idia gogoa taudia ese momoru udaia gaudia lalonai beibi maragidia idia davaria, edia goada ia ore vadaeni edia sinana totona idia taitai momo dainai. Niuspepa ta, ladana O Estado de S. Paulo, dekenai ia gwau, “dala dekenai beibi idia negea sivaraidia be idia momo idia lao.” Momokani, reana gabeai, sinana matamatana ese ia karaia karana dainai do ia lalohisihisi. To, ena beibi ia negea, ena be ena beibi ia mase diba.

Reana oi laloa, ‘Edena bamona sinana ta ese ena natuna do ia rakatania lalohadaina ia abia bena ia diba lasi dahaka do ia vara ia dekenai?’ Baibel ese unai lalohisihisi karana ia gaukaralaia, iseda Havaraia Tauna ena hemami iena taunimanima dekenai ia hahegeregerea totona, ia gwau: “Hahine ta ese iena natuna maragina ia laloaboio diba, a? Iena bogana dekena amo ia havaraia merona, be do ia bogahisihisi henia lasi, a? Io, sedira sinana ta ese iena natuna maragina ia laloaboio diba, to lau ese umui do lau laloaboio lasi momokani.”​—Isaia 49:⁠15.

Dirava ena lalokau ita dekenai bona iseda dabu gaudia ia laloa bada karana ese sinana ta ena kara ia hereaia momokani. Herevana oi be matamata tauna eiava oi bada vadaeni, herevana edena hekwakwanai oi davaria, ta ese oi ia durua diba. Oi ia Havaraia Tauna ia ura oi ia durua bona oiemu mauri dalana ia laloa bada. Salamo torea tauna ia gwau bamona, reana “egu tamana bona sinana, ese lau idia rakatania, to [Iehova] ese lau do ia abia dae.”​—Salamo 27:⁠10.

Tanobada hegegemadai, Gima Kohorona bona Awake! magasin idia halasia, taunimanima ese “Dirava momokani tamona,” Iehova, bona ena Natuna, Iesu Keriso, dekenai diba idia abia totona, badina unai diba idia abia taudia be mauri hanaihanai do idia davaria diba.​—Ioane 17:⁠3.