Sisiba Do Oi Badinaia, A?

MAY 19, 1997 ai, Chittagong, Bangladesh dekenai lai gubana ia toa. Cox Bazaar ena taoni ai lai ena sipidi be kilomita 250 hora tamona lalonai. Gunika gabudiai, kurukuru amo idia karaia rumadia idia boio sibona, bona guna idia gini gabudia dekenai kopukopu ena maka maragidia sibona idia noho. Lai gubana ese au bona telegraf audia be tano amo ia kokidia; ma haida be masisi bamona ia makohia. Niuspepa ladana Bhorar Kagoj ena sinado badana ia gwau lai gubana ese taunimanima 105 ia hamasea.

Hora 36 bamona gunanai, keru bona medu negadia idia gwauraia taudia ese unai lai gubana do ia mai dalana idia halasia vadaeni. Taunimanima tausen handred haida be semensi amo idia karaia hunia gabudia dekenai idia heau bona ita diba unai dainai taunimanima momo idia mase lasi.

Lagani handred mai kahana lalonai, Iehova ena Witness taudia ese idia hahedinaraia nega sisina murinai dika bada herea do ia vara, bona unai dika ese lai gubana ena dika do ia hanaia. Baibel ese unai dina ia herevalaia, ia gwau ‘Iehova ena dina dekenai taunimanima do idia gari bada herea.’ (Ioela 2:​31) Unai dina ena dika amo do ita roho mauri diba, bema Baibel lalonai idia noho peroveta taudia edia sisiba ita badinaia.​—Sekaraia 2:​2, 3.

Lasi, Iehova ena Witness taudia be dika idia perovetalaia taudia lasi. Idia harorolaia sivaraina be helaro sivaraina. Idia ura taunimanima idia durua Dirava ena Basileia idia dibaia totona. Kahirakahira unai Basileia ese tanobada amo dika ibounai do ia kokia. Dirava ena Hereva, Baibel, ese ita ia hadibaia, ia gwau: “Nega daudau lasi lalonai kara dika taudia do idia ore. Edia gabu do umui tahua, to do umui davaria lasi. To manau taudia ese noho gabuna tano do idia abia, do idia helai namonamo, mai moale bona mai maino danu.”​—Salamo 37:10, 11.

[Picture Credit Line on page 32]

WHO/League of Red Cross