“Lata Herea Lebanona Sida Auna Ia Tubu Hegeregerena”

LEBANONA ena ororo hairaidia dekenai, au haida ladadia Arz Ar-rab, anina be “Lohiabada ena Sida Audia” idia tubu. Unai au badadia, guna unai ororo gabuna idia koua momokani be Baibel ese nega 70 mai kahana ia gwauraia​—⁠au ma haida be unai bamona ia gwauraia momo lasi.

Lebanona ena au badadia edia toana ia gwauraia totona, Baibel ese inai bamona hereva hegeregere “hairaina” bona “namo herea” ia gaukaralaia. (Solomona ena Ane 5:15; Esekiela 17:23) Sida auna be bada bona ia noho daudau dainai, idaunega amo idia gaukaralaia ruma bona bouti badadia bona ruma kohudia danu idia karaia totona. Ena bonana bona ena kala kakakakana namo herea be hairai momokani, bona ia lalonai muramura ta ladana resin ia noho dainai ia bodaga lasi bona manumanu ese idia hadikaia diba lasi. Sida audia be lata herea bona bada herea, edia lata be mita 37 bona edia gabana be mita 12 ia abia diba, bona edia ramuna be goada momokani bona tano lalona momokani dekenai idia diho diba. Unai dainai au idia stadilaia taudia haida idia gwau idia ese “tubutubu gaudia ibounai idia hanaia momokani”!

Baibel torea tauna Esekiela ese Mesia be peroveta dalanai ia herevalaia, ia gwau ia be sida au ena rigi matamata hegeregerena gabeai Dirava ese ia hadoa gauna. (Esekiela 17:22) Heberu gado dekenai “sida” idia gwauraia herevana ena anina be “gini goada.” Hari inai negai, Mesia, Iesu Keriso, murinai idia raka taudia be ‘abidadama dekenai do idia gini goada,’ gau ta ese ia hadikaia diba lasi sida au latana bamona. (1 Korinto 16:13) Edena bamona unai idia karaia diba? Mai goada ida Keristani lasi karadia do idia dadaraia bona kara maoromaoro bona Dirava badinaia karana do idia goadalaia karana amo. Unai bamona idia karaia taudia be Baibel ese ia gwauraidia “kara maoromaoro taudia, . . . idia lata herea Lebanona sida auna ia tubu hegeregerena.”​—⁠Salamo 92:⁠12, The New English Bible.