Headava Oi Laloa Noho, A?

Bema tanobada hegegemadai ia vara headava hadokoa karana be tano mareremarere ida ita hahegeregerea, do ita laloa diba United States dekenai tano ia mareremarere bada herea. Vanegai laganina ta lalonai, unuseniai idia hadokoa headava edia namba be milioni ta ia hanaia​—averes be miniti ta ta ai headava rua idia hadokoa. To reana oi diba vadaeni headava hadokoa karana be United States sibona dekenai ia vara lasi.

STADI ta lalonai idia davaria, lagani 1970 amo, Canada, England bona Wales, France, Greece, bona Netherlands dekenai, headava hadokoa karana be nega rua amo ia bada daekau.

Ita diba tatau bona hahine momo idia headava, badina idia lalokau heheni bona idia ura edia mauri ibounai lalonai do idia noho hebou. To madi, nega momo, headava namona lalohadaina be lalohadai ta sibona. Headava maurina korikorina idia mamia murinai, momo idia gwau idia headava haraga eiava adavana maorona idia abia hidi lasi eiava unai lalohadai ruaosi idia gwauraia.

Headava momo idia dika ena badina be dahaka? Tau bona hahine edia turana karana ia herevalaia bukana ta ia torea hahinena ia gwau: “Badina badana be idia hegaegae lasi.” Ma ia gwau: “Edia headava ia dika taudia ida lau gaukara neganai, hemami rua lau abia​—hebogahisi bona badu. Lau hebogahisi, badina idia ese edia ura gauna, headava lalonai idia ruaosi do idia moale hebou urana, ia guguru lasi. Lau badu, badina ia guguru totona idia hekwarahi bada be gau badana idia lalo-pararalaia lasi.”

Oibe, momo idia headava to headava namona karaia dalana be sisina sibona idia diba, eiava idia diba lasi momokani. To, unai be hoa gauna lasi. Tisa tauna ta ia gwau: “Iseda matamata taudia hida be koledi dekenai idia lao bona bita bona ariha edia kara idauidau idia stadilaia, to taunimanima rua, tau bona ena hahine, edia kara idauidau idia dibaia lasi.”

Reana oi ura oi headava eiava oi headava vadaeni​—unai headava oi laloa noho, a? Bema oibe, namona be oi diba mauri korikorina lalonai tau bona hahine edia turana karana be muvini piksa, televisen program, bona lalokau sivaraidia ese idia hahedinaraia bamona lasi. To danu, bema idia laloa namonamo bona idia lalokau heheni momokani tau bona hahine idia headava, ita gwau diba edia headava be hahenamo ta Dirava ena amo. (Aonega Herevadia 18:22; 19:14) Vadaeni, edena bamona oi diba oi hegeregere vadaeni headava maurina ena maduna oi huaia? Adavana oi abia hidi neganai, dahaka gaudia oi laloa namonamo be namo? Eiava, bema oi headava vadaeni, edena dala ai oiemu headava lalonai do ia noho daudau moalena oi davaria diba?