Basileia Haroro Ripoti
‘Nega Namodia Bona Nega Dikadia ai’ Idia Haroro
TUARI be Bosnia bona Herzegovina ai ia vara neganai, taunimanima tausen tausen ese hekwakwanai badadia idia davaria. Unai hetoho negana lalonai, Iehova ena Witness taudia be idia hekwarahi bada, taunimanima idia hagoadaia bona helaro idia henia totona. Henunai be Witness tauna ta ese ia torea revarevana ena hereva haida, ia be nega sisina lalonai Sarajevo dekenai ia haroro.
“Mauri ia auka iniseniai, to taunimanima ese Baibel ena hereva momokani idia abia dae. Inai gabu ena Witness taudia be haheitalai namona haheauka karana dekenai. Tauanina dalanai idia ogogami, to lalohadai namona idia hahedinaraia. Kongregesen lalonai idia noho matamata taudia kahirakahira ibounai be ful-taim hesiai gaukara idia karaia. Unai lalo-goada karana ese pablisa matamata taudia ia hagoadaia, bona nega momo edia haroro gaukara huana ginigunana amo hua ta ta hora 60 o ma haida be haroro gaukara dekenai idia gaukaralaia.
“Ruma ta ruma ta dekenai ai haroro sibona lasi, to ma dala idauidau ai tohoa, taunimanima ai davaridia totona. Hegeregere, ai ese unai siti ena gara gabudia idauidau ai anina namona ai havaraia, taunimanima dekenai Baibel bukadia bona magasin ai hariharilaia neganai.
“Hospital dekenai ai haroro danu. Sarajevo ena hospital ta dekenai Cardiology Department ai ia gaukara doketa tauna badana ese December 8, 1996, Awake! ia abia, ena hereva kwarana be ‘Heart Attack—What Can Be Done?’ Ia ese unai magasin ena kopi ma haida totona ia henanadai, doketa ma haida do ia henidia totona. Bena ia ese Witness taudia dekenai gwaumaoro ia henia iena dipatmen ai idia noho gorere taudia idia vadivadi henia totona. Vadaeni, hora ta ia hanaia sisina lalonai, magasin 100 bona ma haida be bedi ta bedi ta dekenai ai hariharilaia. Gorere taudia momo idia gwau unai be nega ginigunana, ta ese hospital dekenai idia ia vadivadi henia, idia dekenai hagoadaia hereva bona helaro idia henia totona.
“Nega ma ta ai Pediatric Department dekenai ai lao bona natudia totona magasin namodia ai abia lao danu. Doketa badana ese Lau Egu Bible Sivarai Buka haida ia abia, duahiduahi gabuna ai ia atoa totona. Hari, hospital dekenai edia natudia idia vadivadi henia sina haida be dina ta ta edia natudia dekenai Baibel sivaraidia idia duahia. Dala ai karaia, unai doketa be ena ruma dekenai ai vadivadi henia totona.
“Sarajevo dekenai, NATO [North Atlantic Treaty Organization] ena tuari taudia tausen momo idia noho bona idia be tano idauidau taudia. Idia danu ai haroro henidia namonamo. Nega haida ai be tuari motuka ta amo ma ta dekenai ai lao ai haroro totona bona inai buklet Good News for All Nations bona Gima Kohorona bona Awake! magasin gado idauidau dekenai ai gaukaralaidia. Italy tuari taudia edia kamepa dekenai ai ese magasin 200 bona ma haida ai hariharilaia. Ai hoa badina Italy tuari taudia idia gwau guna Iehova ena Witness taudia ida idia herevahereva lasi. To idia ai davaria Sarajevo dekenai.
“Dina ta, tuari taudia edia motuka ta be dala kahana ai ia noho. Unai motuka dekenai lau pidipidi egu damaru amo, bena tuari tauna ta ia raka lasi. Lau ese Gima Kohorona ta, ena hereva kwarana be ‘Maino Gwauraia Taudia—Idia be Daidia?’ lau hahedinaraia. Unai tuari tauna be lau ia itaia bena ia henanadai, ia gwau ‘Oi be Iehova ena Witness tauna ta, a?’ Lau gwau lau be Witness tauna ta bona ia gwau, ‘Inai be hoa gauna; umui be iniseniai umui noho danu! Tanobada ai Witness taudia be idia noho lasi gabuna ta ia noho, a?’ ”[1]
Aposetolo Paulo ia gwau: “Sivarai Namona do oi harorolaia goadagoada, nega namodia neganai, bona nega dikadia neganai danu.” (2 Timoteo 4:2) Edia tadikaka bona taihu tanobada hegegemadai dekenai idia karaia hegeregerena, Iehova ena Witness taudia Sarajevo dekenai be unai bamona idia karaia danu, bona idia ese bedi ta amo ma bedi ta bona tuari motuka ta amo ma tuari motuka ta dekenai idia haroro danu.