Dagedage—Kahirakahira Do Ia Ore ela Bona Hanaihanai!
“Dagedage ese Bese Ia Hadikaia”—The New York Times, United States.
“Dagedage, Ruma Lalonai”—O Globo, Brazil.
“Dagedage ese Tanobada Hahinedia Ia Gavaia”—The Globe and Mail, Canada.
INAI hereva, North bona South America edia niuspepa lalonai ese tanobada ibounai ia hadikaia gaudia ia hahedinaraia. Vanegai sibona World Health Organization ia gwau, “vanegai laganidia lalonai dagedage karadia idauidau be hoa dalanai idia bada daekau.”
Mani inai namba idauidau oi laloa:
Ala-ala karana. Dina ta ta ai, Latin America bona Caribbean dekenai, taunimanima 1,250 bamona be dagedage dainai idia mase. Unai dainai, “unai gabu ruaosi edia tano momo ai, edia mauri lagani be 15 ia lao 24 matamata taudia momo edia mase ena badina badana be ala-ala karana.”
Natudia dagedage henia karana. Natuna hadikaia karadia tauanina ai, hemami ai, bona sihari henia karana ai, be tanobada ibounai lalonai idia vara. Hegeregere, “kohu momo tanodia lalonai, taunimanima badadia idia henanadai henia neganai, ia hahedinaraia, reana natudia iboudiai amo 10 pesen ia lao 15 pesen be ta ese ia sihari henia—bona idia momo be kekeni.”
Hahine dagedage henia karana. Lagani 1997 lalonai, tanobada ibounai lalonai taunimanima edia maoro idia hadikaia karana idia tahua neganai, tahua taudia idia davaria “kahirakahira tanobada ibounai lalonai, hahine ese idia davaria hisihisi ena badina badana ta be ruma bese lalonai ia vara dagedage karana.” (Human Rights Watch World Report 1998) Ruma bese lalonai ia vara dagedage karana be gabu momo dekenai taunimanima ia hadikaia to unai kara idia ripotilaia lasi, bona hari idia gwau ia be “inai nega lalonai idia gwauraia hedinarai lasi hekwakwanaina.”—The Globe and Mail, Canada.
Noa ena nega ai danu “dika be gabu ibounai dekenai” ia vara. (Genese 6:9-12) To Iehova Dirava ese “abata bada herea ia havaraia” bona kara dika taudia ibounai idia mase neganai, “kara maoromaoro ia harorolaia tauna” bona ena bese ia hamauria. Dirava be unai bamona do ia karaia iseda nega ai danu. Ia ese “Dirava badinaia taudia” do ia hamauria, dagedage bona kara dika taudia ia haorea neganai bona ena gwauhamata hegeregerena, nega matamata lalonai tanobada be paradaiso ai do ia halaoa. (2 Petero 2:4-9; 3:11-13) Oi moale bada, badina oi diba dagedage be kahirakahira do ia ore ela bona hanaihanai, a?