Ladana Namona Naria Namonamo

IDIA penia laulau mai hairaina oi stadilaia namonamo neganai, moale oi davaria diba. Oi itaia namonamo neganai, do oi davaria laulau penia tauna ese nega handred momo barasi ia gaukaralaia, dabua dekenai unai kala idauidau ia atoa totona.

Ladana namona ia vara dalana danu be unai bamona. Ia be nega tamona ai barasi lababana amo penia karana ese ia havaraia diba lasi, to nega daudau lalonai ta ese ia karaia karadia maragimaragidia amo ia vara. Momokani, metairametaira iseda ladana namona be ita karaia karadia ese idia hahedinaraia.

Danu, nega tamona barasi gaukaralaia kerere karana ese laulau ena davana do ia hamaragia diba. Iseda ladana danu be unai bamona. Aonega King Solomona ia gwau: “Taunimanima haida be sibodia edia kavakava, ese idia ia hakererea.” (Aonega Herevadia 19:3) Kavakava karana maragina​—reana badu karana mai dagedage danu, nega tamona inuinu kekero karana, o kara mirona ta​—ese ladana namona ia hadikaia diba. (Aonega Herevadia 6:32; 14:17; 20:1) Unai dainai, ladana namona ita abia totona ita hekwarahi be mai anina bada, bona ita gaukara goadagoada ita naria namonamo totona.​—Apokalupo 3:⁠5 itaia.