Vairana Hahairaia Gaudia Ia Hereaia Gauna

“MURIMURI toana hanamoa gaudia,” hahine ese edia toana hahairaia totona idia gaukaralaia gaudia, ia herevalaia murinai, aposetolo Petero be sisiba ia henia, ia gwau: “To, namona be oiemu hairai be oiemu lalona momokani gauna, ia dika diba lasi hairaina, mai ena manada bona manau, bona Dirava vairanai ia be mai anina bada gauna.”—1 Petero 3:​3, 4, Today’s English Version.

Aposetolo Petero ese unai toana hahairaia gaudia ia herevalaia neganai, ia ese Greek hereva ta koʹsmos amo ia mai herevana ta ia gaukaralaia, bona English hereva “cosmetic” be unai hereva amo idia abia, ena anina be “kopina toana hahairaia.” Petero ese Keristani hahinedia ia koua, vairana penia gaudia bona toana hahairaia gaudia ma haida idia gaukaralaia lasi totona, a? Dirava ena Hereva lalonai unai bamona hereva ta ia noho lasi. To, gwaumaoro ia henia ta ta sibona be unai do idia abia hidi diba, unai dainai toana idauidau do ita itaia diba.

To, bema vairana penia gaudia momo idia atoa kava, o unai idia karaia dainai ma haida edia hemami ia dika, unai ese dahaka ia hahedinaraia? Ia ese hairai lasi, manau lasi, anina lasi, heagi, bona sibona laloa bada karadia ia hahedinaraia, ani? Momokani, unai ese hahine ta ena toana ia hadikaia diba, bona reana ta ena kara goeva ia hunia.​—Esekiela 23:36-​42 itaia.

Unai ia diba dainai sibona ia gwauraia ‘Dirava ia matauraia’ hahinena bema ia ura kopina toana ia hahairaia gaudia ia gaukaralaia, do ia hekwarahi ena vairana penia karana ese laloa maoromaoro, manada, kara namo, bona manau ia hahedinaraia totona. Unai bamona karadia ese ena kara do idia hanamoa bona hahairaia. Momokani herevana ena vairana do ia penia o lasi, to ia ese hemataurai bona lalona ena hairai ia hahedinaraia. Unai ese ia hahedinaraia ia diba, Petero ena hereva ataiai ia noho herevana hegeregerena vairana hahairaia gaudia ia hereaia gauna ta ia noho.​—1 Timoteo 2:​9, 10.