Heduru Herevadia Turana Namodia Abia Hidi Totona

SIVARAI ta Reader’s Digest lalonai ese ia hahedinaraia, matamata taudia be dabua bona miusiki abia hidi totona edia tama sina dekenai idia lao lasi to edia sikuli turadia dekenai idia lao. Unai dainai gau badana be tama sina idia diba edia natudia be edeseniai bona daidia idia bamoa.

South Africa ena iunivesiti ta ai Department of Psychology ena hereva henia hahine badana, Esmé van Rensburg, ia gwau: “Emui maduna be do umui tahua.” Ma ia gwau: “Reana emui natuna be umui dekenai do idia badu, to edia badu do ia ore.” Bena ia ese tamadia bona sinadia dekenai inai heduru herevadia ia gwauraia. Namona be taravatu idia maoromaoro bona idia be mai edia hakaua herevadia; emui natuna umui hakala henia; umui badu haraga lasi, to umui lalo-maino, bona umui ura herevalaia gaudia umui laloa guna be namo. Bema emui natuna be umui ura henia lasi tauna ta ida ia hetura karaia vadaeni, unai hetura karana umui koua sibona lasi, to unai hetura karana ese ia havaraia kara kereredia umui hahedinaraia.

Sisiba namona tamadia bona sinadia totona be ia noho vadaeni Dirava ena Hereva, Baibel, lalonai. Hegeregere, ia gwau: “Hereva dekenai do umui kamonai haraga, to hereva do umui gwauraia haraga lasi. Bona do umui badu haraga lasi.” (Iamesi 1:19) Danu, Baibel ese inai sisiba namona ia henia turadia abia hidi karana dekenai, ia gwau: “Aonega tauna danu ia raka hebou noho tauna, be do ia aonega, to kavakava taudia danu oi turana karaia neganai, dika do oi davaria.” (Aonega Herevadia 13:20) Unai haheitalai ese Baibel idia duahia bona ena hereva idia laloa bada bona dina ta ta ai edia mauri lalonai idia badinaia taudia idia abia diba aonegana idia hahedinaraia.