“Bema Damena Ena Mamina Ia Ore”
TUARI be ia dainai idia vara. Moni bamona idia gaukaralaia. Idaunegai China dekenai ia be dava bada gauna iharuana, golo murinai. Oibe, nega daudau lalonai taunimanima idia laloa damena be dava bada gauna ta. Unai nega amo ema bona hari, idia laloa ia ese gorere ia hanamoa diba, bona tanobada ibounai lalonai idia gaukaralaia aniani ena mamina hanamoa bona ia bodaga lasi totona.
Damena ena namo bona idia gaukaralaia daladia be momo dainai, Baibel lalonai laulau dalanai idia gaukaralaia be hoa gauna lasi. Hegeregere, Mose ena Taravatu ia gwau, pata latanai Iehova dekenai idia bouboulaia gaudia ibounai dekenai damena idia atoa be namo. (Levitiko 2:13) Unai idia karaia ena badina be boubou gaudia edia mamina hanamoa totona lasi, to damena ese dika o bodaga ia koua gauna ia laulaulaia dainai.
Iesu ese ena Hereva Badana Ororo Dekenai ia henia neganai, ena murinai idia raka taudia ia hamaoroa, ia gwau: “Umui be tanobada taunimanima edia damena.” (Mataio 5:13) Unai hereva amo, Iesu ese ia hahedinaraia ma haida dekenai Dirava ena Basileia idia harorolaia ese idia kamonai taudia do ia hanamoa, o hamauria diba. Momokani, bema Iesu ena hereva idia badinaia, edia noho gabudia o gaukara gabudia dekenai idia vara kara miro bona lauma dalanai dika idia havaraia gaudia ese idia hadikadia lasi.—1 Petero 4:1-3.
To, Iesu ese inai sisiba ia gwauraia: “Bema damena ena mamina ia ore, . . . Ia be namo lasi gauna, vadaeni taunimanima ese dohore idia negea, bona edia aena dekenai do idia moia loaloa.” Baibel tahua tauna Albert Barnes be unai ia herevalaia neganai ia gwau, Iesu bona ena hahediba taudia idia diba damena be ia “goeva lasi, ia be uma aniani bona hadohado tano ena kahana haida danu idia mikisia hebou gauna.” Unai dainai bema damena ena mamina ia ore, reana “tano sisina bada” be do ia noho. Barnes ia gwau: “Unai be anina lasi gauna . . . to raka gabudia ai do idia atoa diba nadi maragimaragi ita gaukaralaia bamona.”
Unai sisiba idia badinaia dainai, namona be Keristani taudia idia naria namonamo edia haroro gaukara idia hadokoa o Dirava badinaia lasi karadia ai idia moru garina. Bema lasi, idia be lauma dalanai do idia dika idia lao bona anina lasi gaudia ai do idia lao diba, ‘ena mamina ia ore damena’ bamona.