Idia be “Dirava Dekenai Idia Gari”

AIGUPITO ai Israela taudia be hesiai gaukara idia karaia negana lalonai, Heberu hahine idia mara neganai heduru idia henia hahinedia, Sipora bona Pua, edia gaukara ese idia dekenai metau ia havaraia diba. Bese idau taudia edia namba ia daekau haraga koua totona, Farao ese unai hahine ia hamaorodia: ‘Heberu hahine ese natuna idia havaraia neganai, bema mero ia vara, umui alaia.’​—Esodo 1:​15, 16.

Sipora bona Pua be “Dirava dekenai idia gari,” unai dainai mai gari lasi ida “Aigupito ena king ena hereva idia badinaia lasi.” To, idia ese memero maragidia ibounai idia hamauria, ena be unai gari lasi karana dainai dika badana idia davaria diba. Iehova ese “hanamoa inai durua henia hahine” dekenai ia henia, bona edia hamauria karana dainai ia hanamodia.​—⁠Esodo 1:​17-21.

Unai sivarai ese ia hahedinaraia, Iehova ese ia idia hesiai henia taudia ia laloa bada. Ia laloa diba Sipora bona Pua edia kara be hebogahisi karana ta sibona, ena be mai gari lasi ida unai kara idia karaia. Momokani, ia laloa maoromaoro diba hahinena ese natuna maragidia do ia hamasea lasi! To, Iehova ia diba danu haida be, taunimanima gari henia karana dainai, mai dagedage ida idia kara. Ia diba unai durua henia hahinedia be hebogahisi karana sibona ese ia doridia lasi, to danu, Dirava idia gari henia bona idia badinaia dainai unai bamona idia karaia.

Ita moale bada diba, badina iseda abidadama kara namodia ia laloatao Diravana ita hesiai henia! Momokani, reana ita ta lasi ese Sipora bona Pua idia abia abidadama tohoa hahetohona hegeregerena ita davaria. To, bema gau maorona totona ita gini goada​—sikuli gabunai, gaukara gabunai, o ma gabu idauna ta dekenai​—Iehova ese unai lalokau karana mai abidadama ida be do ia laloa bada. “Dirava idia tahua taudia ibounai, be davana namona Dirava ese do ia henidia.” (Heberu 11:⁠6) Oibe, “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi. Umui ese Dirava umui lalokau henia. Inai lalokau ese laloa namodia umui dekenai ia havaraia, vadaeni umui ese Dirava ena taudia umui durua vadaeni, bona do umui durua noho danu.”​—Heberu 6:⁠10.