“Abidadama ese Idia Ia Hagoadaia Dainai Kara Namo Idia Goadalaia”

LAGANI 1998 ai, France gado ai buka matamatana ladana Les Témoins de Jéhovah face à Hitler (Iehova Ena Witness Taudia Hitler Ena Vairanai), Guy Canonici ese ia torea gauna idia halasia, bona diba bada taudia momo ese unai buka idia moalelaia. Momo ese idia matauraia France ena histori torea tauna, François Bédarida, ese unai buka ena hamatamaia herevana dekenai inai bamona ia torea: “Inai buka be momo ese do idia moalelaia bukana. Badina be ita diba lasi gaudia ia hahedinaraia sibona lasi, to nega maorona ai idia halasia dainai. . . . Daika be, diba bada taudia hegeregerena, Iehova ena Witness taudia ese Nazi Gavamani henunai idia abia hisihisi ia diba? To, unai gavamani ena lohia laganidia 12 lalonai, idia be hanaihanai dagedage bada herea mai kara dika danu idia hisihisilaia. Idia danu ese dibura kamepa dikadia edia mauri dikana idia mamia. Idia danu ese edia abidadama bona idia abia dae gaudia dainai idia mase. Dahaka dainai histori ese inai Keristani taudia edia sivarai idia laloaboio? . . .

“Dahaka dainai ala-ala karadia bona hanaihanai idia karaia dagedage karadia be inai orea maragina, gabu idauidau ai idia noho taudia, bona dika idia havaraia lasi taudia, edia orea dekenai idia karaia? Unai be henanadai badana unai hoa gauna dekenai. Germany dekenai Witness taudia be momo lasi dainai sibona lasi​—ripoti idauidau ese idia hahedinaraia idia be 20,000 unai tano taudia 60 milioni bamona huanai​—to idia ibounai be maino taudia, taravatu idia badinaia bona taunimanima ta idia hadikaia lasi, idia ura idia gaukara sibona bona edia natudia idia naria namonamo. . . .

“Inai dagedage karana be lauma dalanai idia goada lalo-auka bona kwalimu abidadama taudia, murimuri ai idia noho gaudia edia siahu ese edia lalona dekenai ia noho Iesu abidadama henia siahuna idia hamaragia diba lasi taudia, dekenai ia vara, ia be pulisi taudia ese idia biagua Gavamanina ese idia dagedage henidia neganai ia matamaia​—ela bona edia abidadama dainai idia mase bona idia kwalimu.”

Iehova ena Witness taudia, tomadiho inai henia taudia ese idia hahisia lalonai, edia Keristani abidadama dainai idia mase taudia, edia sivarai be mai ena siahu. Unai buka idia riviulaia neganai, France ena lada bada Katolik niuspepa, La Croix, be unai ia hahedinaraia namo herea, ia gwau: “Edia sivarai, momo idia diba lasi sivaraina, lalonai idia vara momokani gaudia momo herea be Guy Canonici ese ia haboua, idia dainai ta be ia hereva diba lasi, badina auka lasi herevadia amo idia gwauraia diba abidadama ese idia ia hagoadaia dainai kara namo idia goadalaia, abidadama ia ore diba lasi ela bona dokona bona maragidia ese idia hahedinaraia diba danu. Unai dala ai edia kara idia laloa lou karana dainai hari Iehova ena Witness taudia edia Keristani maurina idia hepapahuahulaia taudia ese diba maorona idia abia.”