Taunimanima be Animal Hereadia, A?

“Iseda lalohadai mauri ena matamana dekenai ese gau ta ia haidaua diba, a?”

Brazil ai ia noho lagani 16 kekeni ta ese inai henanadai “Taunimanima be Animal Hereadia, A?” amo ena hereva ia hamatamaia. Iena tisa ese unai ia herevalaia June 22, 1998 ena Awake! ia abia murinai, tisa ese inai stiuden ia boiria ena klas taudia dekenai unai henanadai do ia herevalaia totona.

Unai Witnes matamatana ese ia hahedinaraia evolusen ena hahediba hereva be dika momokani, unai hahediba ia gwau mauri gaudia goadadia sibona idia noho diba. Hegeregere, momo idia laloa evolusen lalohadaina dainai, haida idia gwau tuari be vaia mauri ena hekwarahi ta sibona, bona unai ese Fascist bona Nazi taudia ia durua idia tubu totona.

Unai stiuden ese ia hahedinaraia taunimanima bona animal edia idau be bada herea. Ia gwau: “Taunimanima sibona be lauma dalanai idia tubu diba. Taunimanima sibona idia hekwarahi mauri ena anina bona badina idia diba totona. Taunimanima sibona be mase dainai idia lalo-hekwarahi, idia vara ena badina idia laloa, bona edia ura be do idia noho hanaihanai. Nega ita atoa ita vara ena badina sisina ita diba totona be gau badana!”

Hereva ia henia namo herea dainai tisa ese ia hanamoa. Ia gwau unai ia karaia diba badina inai Witnes matamatana be duahiduahi karana ia ura henia. Sikuli gabunai idia diba ia be Baibel bukadia Awake! bona Gima Kohorona bamona ia ura duahia momo kekenina.

Iehova ena Witnes taudia be matamata taudia idia laloa momo, badina evolusen ena lalohadai be edia kudouna bona lalona ia veria noho. Unai dainai, unai kekeni ia lao henia kongregesen ese Witnes matamata taudia idia hagoadaia June 22, 1998 ena Awake! magasin be edia tisa taudia bona sikuli turadia do idia henidia. Magasin ibounai 230 be siti ena sikuli idauidau dekenai idia henia. Sikuli ta ena Saiens Dipatmen ia naria tauna be Awake! magasin totona sabskripsen ia abia.

Momokani, iseda lalohadai mauri ena matamana dekenai ese gau ta ia haidaua diba! Inai kekeni matamatana bona ena turadia ese idia hahedinaraia, Havaraia Tauna abidadama henia karana ese edia mauri ia haidaua momokani.