Daika ese Dagedage Karana Do Ia Haorea?

SEPTEMBER 1999 ai, UN Seketere-Jeneral Kofi Annan ese General Assembly ena lagani ta ta hebouna namba 54 totona idia mai taudia ia welkam henia. The Toronto Star niuspepa ai idia ripotilaia bamona, ia ese tanobada ena gunalaia taudia dekenai gau badana ta ia herevalaia, ia gwau, “Taunimanima momo herea be tanobada besedia amo hebogahisi herevana sibona idia abia be hegeregere lasi. Idia dekenai ia vara dagedage karana ena heau dalana haorea bona noho namona ena dala dekenai idia ia hakaua momokani totona nega daudau heduru korikorina ena gwauhamata be gau badana.”

UN oreana bona ena memba besedia ese dagedage karana haorea totona “nega daudau heduru korikorina ena gwauhamata” idia henia diba, a? Unai Star niuspepa ena ripoti tamona lalonai, U.S. Presiden Bill Clinton ia gwau: “Inai lagani 100 ena rara bada bubua karana murinai, ita diba ita hereva haraga diba, ‘do ia vara lou lasi,’ to unai ita badinaia be auka.” Ma ia gwau: “Ita hagugurua diba lasi gwauhamatana ita karaia ena dika be ta ita laloa lasi karana ena dika ida ia hegeregere.”

Lagani 2,500 gunanai, peroveta tauna Ieremia ese taunimanima edia hekwarahi be inai bamona ia gwauraia: “Lohiabada e, lau diba taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho.” (Ieremia 10:23) Vadaeni, dahaka helaro ia noho dagedage karana haorea totona?

Dirava ese gwauhamata ia henia, Isaia 60:18 ai ita duahia hegeregerena: “Dagedage bona heatu ena regena, be do oi kamonai lou lasi. Gau ta ese oiemu tano do ia hadikaia lou lasi.” Dirava ese ena taunimanima, idia abia lao taudia, be edia tano dekenai ia abidia mai neganai, unai peroveta herevana be nega ginigunana ia guguru. Ena guguru negana badana, ita ese do ita moalelaia negana, ia noho danu. Iehova Dirava be ia “hagugurua diba lasi gwauhamatana” ia henia lasi. Ia be Atai Herea Momokani Diravana bona Havaraia Tauna dainai, ia ese “dagedage karana ena heau dalana” ia haorea diba. Dirava ena Basileia henunai, maino do ia noho. Dagedage karana be do ia ore ela bona hanaihanai!​​—⁠Daniela 2:​44.