Kara Namodia ese Dirava Ena Ladana Idia Hanamoa

DIRAVA idia lalokau henia taudia be iena Hereva, Baibel, ena lauma diarina idia hahedinaraia toho. Unai dala amo idia be Iesu ena hahegani idia badinaia, ia gwau: “Umui emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai, umui emui Tamana guba dekenai do idia hanamoa.” (Mataio 5:​16) Hereva bona kara namodia ese Dirava ena ladana idia hanamoa.

Iehova ena Witnes taudia be Dirava idia hamoalea totona Baibel ena hereva idia badinaia bona lauma dalanai ma haida idia durua. Ena be tano haida ai gavamani ese edia haroro gaukara ia do rejista lasi, to unuseniai danu unai idia karaia. Unai bamona tano ta ena siti badana dekenai, Witnes taudia ese lagani ta ta ai hebouhebou idia karaia bona taunimanima 6,000 ia lao 9,000 be unuseniai idia lao. Unai bamona hebou idia karaia totona, idia be taunimanima ese kohu idauidau idia hahedinaraia gabuna badana amo gabu idia rentaia. Lagani gunadia lalonai idia karaia bamona, lagani 1999 ena hebouhebou idia do abia lasi neganai, Witnes taudia handred momo be unai gabu idia hagoevaia bona saun gaudia bona helai gaudia tausen momo idia atoa.

Unai gaukara ibounai lalonai idia hekwarahi kava lasi. Unai gabu ena naria taudia be unai kara ibounai idia itaia. Danu, idia itaia ena be taunimanima 15,666 idia hebou, to gau ibounai idia heau namonamo bona Witnes taudia edia kara be namo. Ma danu, unai hebouhebou murinai idia karaia hagoevaia gaukarana be gabu naria taudia idia hoalaia bada.

Unai gabu naria taudia ese unai gaukara ibounai idia laloa bada, bona unai idia hahedinaraia totona Witnes taudia edia ladana be pepa ta dekenai idia torea, lagani gabena ai unai gabu do idia gaukaralaia diba totona. To, unai gabu naria taudia ese gau ma ta idia karaia danu. July 15, 1999 ai, edia laloa bada karana hahedinaraia totona, hebouhebou komiti dekenai harihari gauna ta idia henia. Unai harihari gauna latanai idia koroa herevana be “Iehova ena Witnes taudia edia kongregesen”​​—⁠edia Baibel hadibaia gaukarana ia koua tanona ai unai be hoa gauna momokani.

Lagani 2000 ia lao 2001 lalonai, tanobada hegegemadai taunimanima milioni momo be Iehova ena Witnes taudia edia “Dirava Ena Hereva Badinaia Taudia” Distrik Hebouhebou handred momo dekenai do idia lao. Bema unai hebouhebou dekenai oi lao, do oi itaia edena bamona mai momokani ida Baibel ena hereva idia badinaia taudia ese Dirava ena ladana idia hanamoa karadia idia karaia.