Hereva Lasi Karana amo Idia Lalo-Namo Henia

BUKA ladana Betrayal​—⁠German Churches and the Holocaust ese mai momokani danu tomadiho ena gaukara Nazi gavamani lalonai ia gwauraia. Unai buka ia gwau: “Keristani taudia momo ese unai gavamani ena lohia dalana idia abia dae, bona idia momo ese Iuda taudia dagedage henia karana dainai gau ta idia karaia lasi. Unai neganai, edia hereva lasi karana be hereva badabada bamona.”

Dahaka ese sibona idia gwauraia Keristani taudia ia veria Nazi gavamani dekenai? Unai buka ia gwau, idia momo be Hitler ena “taravatu bona naria dalana Germany taudia dekenai” ese ia veridia. Unai buka ia gwau: “Ia ese matabodaga laulaudia eiava sivaraidia, ariara karadia, bogana lalonai natuna hamasea karana, tatau idia sihari heheni karana, bona unai nega ena laulau ‘dikadia’ ia gwauraia dika, bona ia ese kapa, siliva, bona golo medolo be natuna 4, 6, bona 8 idia havaraia hahinedia dekenai ia henia, unai amo idia ia hagoadaia sene karana do idia badinaia bona ruma dekenai do idia gaukara noho. Versailles Treaty ese ena bese ia hahemaraia dainai, Hitler be unai guna idia laloa bada karadia edia namo ia hahedinaraia, bona tuari laloa bada bona bese abia isi karana ia habadaia, bena unai amo Nazi gavamani be taunimanima momo ese idia abia dae, Germany dekenai idia noho Keristani taudia momo ese idia abia dae danu.”

To orea ta be ia idau momokani. Betrayal ia gwau: “Iehova ena Witnes taudia idia ura lasi dagedage karadia idia karaia bona ami lalonai idia vareai.” Unai dainai, unai orea maragina ese dagedage bada herea ia davaria, bona ena orea taudia momo be dibura kamepa dikadia ai idia atoa. To, sibodia idia gwauraia Keriso ena murinai idia raka taudia be unai kara idia gwauraia dika lasi. Unai buka be ma ia gwau: “Katolik taudia bona Protestan taudia be nega momo Iehova ena Witnes taudia idia badu henia to nega haida sibona idia hebogahisi henia, bona idia ese Hitler ena dagedage karadia idia badinaia to Witnes taudia edia gini siri karana idia matauraia lasi.” Edia hereva lasi karana ese Nazi gavamani ena Witnes taudia dagedage henia karana ia habadaia.

Dubu be Nazi gavamani ena politikol karadia lalonai idia vareai dainai taunimanima momo ese unai idia hepapahuahulaia noho, to Betrayal ia gwau Iehova ena Witnes taudia be “unai gavamani ia gwauraia namo lasi bona ia danu ia gaukara hebou lasi tomadiho oreana.”