Kahirakahira Tomadiho Idaudia Idia Lalo-Tamona, A?

Kahirakahira Tomadiho Idaudia Idia Lalo-Tamona, A?

Lutheran World Federation edia presiden, Christian Krause, ia gwau: “Ita be eda dubu edia sivarai lalonai inai mai anina bada dinana ita laloa.” Unai hegeregere, Pope John Paul Iharuana ese “Keristani taudia huanai mai hekwarahi danu lalo-tamona haginia lou totona idia karaia karana badana ta” ia herevalaia.

Unai hereva be October 31, 1999 ai, Augsburg, Germany dekenai, Doctrine of Justification dekenai edia Gwaubou Karana idia hamomokania totona Gwaubou Herevana idia sainia neganai idia gwauraia herevadia. Unai hereva idia sainia negana bona gabuna be idia abia hidi goevagoeva. Haida idia gwau October 31, 1517 ai, Martin Luther ese ena hahediba herevadia 95 be Wittenberg ena dubu badana ena iduara dekenai ia kokoa, Protestan edia Refomeisen ia hamatamaia totona. Bona lagani 1530 ai, Augsburg dekenai, Lutheran taudia ese edia hakaua hereva badana, Augsburg Confession idia hahedinaraia, bona unai be Katolik Dubuna ese idia dadaraia, unai amo Protestan tomdihodia bona Katolik tomadihodia edia padana ia daudau momokani.

Unai Gwaubou Karana be dubu idia lalo-tamona lasi karana do ia hanamoa gauna badana ta, a? Gwaubou taudia haida edia lalohadai be unai bamona lasi. Protestan ena tomadiho gunalaia taudia 250 be koua herevana ta idia sainia, unai amo Katolik Dubu ese do ia biagudia garina hadibaia hereva idia halasia. Bona Katolik taudia be lagani 2000 totona dika davana henia bona gwauatao herevana ta idia halasia neganai, Protestan taudia be idia lalohisihisi, unai be lagani 500 bamona gunanai idia ia hapararaia karana. Bona Augsburg Confession pepana bona Katolik ese unai idia dadaraia pepana, Council of Trent amo, be ia do noho dainai, lalo-tamona dalana be auka.

Kerisendom huanai idia parara bona idia lalo-tamona lasi karana be bada herea dainai gwaubou herevana ta idia sainia karana ese do ia hanamoa lasi. Danu, abidadama lalonai lalo-tamona do ia vara bema hahediba herevadia edia badina be Baibel, Dirava ena hereva. (Efeso 4:3-6) Lalo-tamona momokanina be gwaubou amo ia vara lasi, to Dirava ia ura karaia karadia amo ia vara. Abidadama peroveta tauna Mika ia gwau “bese ta ta ibounai ese sibodia edia dirava, edia dirava idia tomadiho henia bona kamonai henia. To ita ese [Iehova], iseda Dirava do ita tomadiho henia, bona kamonai henia, ela bona hanaihanai.”—⁠Mika 4:⁠5.

[Picture Credit Line on page 32]