“Oiemu Hudo Hanamoa Gauna”
MOMO idia laloa, taunimanima edia gorere momo be lalo-metau gaudia hegeregere gari, lalohisihisi, mama, badu, inai henia karana bona kara kerere ena hemarai mamina ese idia havaraia. Unai dainai, Baibel ena hereva be ita ia hagoadaia bada, ia gwau ‘Iehova gari henia karana’ be “oiemu hudo hanamoa gauna bona oiemu turia hagoadaia gauna”!—Aonega Herevadia 3:7, 8.
Turia be tauanina idia haginia goada gaudia. Unai dainai, laulau dalanai Baibel ese inai hereva “turia” ia gaukaralaia tau ta—ena hemami bona lalohadai goadadia—ia gwauraia totona. To edena dala ai Iehova gari henia karana be “oiemu hudo ia hanamoa gauna”?
Inai hereva lalonai, Baibel idia stadilaia diba bada taudia ese inai hereva “hudo” dekenai edia lalohadai be idauidau. Baibel ena hereva edia anina ia tahua tauna ta ia gwau, ia be “tauanina ena huanai ia noho” dainai, reana “hudo” be tauanina ena lalonai gaudia badadia ia laulaulaia. Diba bada tauna ma ta be ia laloa unai hereva “hudo” ena anina be reana hudo varona, Esekiela 16:4 dekenai idia gaukaralaia hegeregerena. Bema unai be momokani, reana Aonega Herevadia 3:8 be Dirava ita tabekau henia momokani karana ia gwauraia hedinarai—ita be ia do vara lasi beibi bamona, sinana sibona amo aniani ia abia diba dainai ia dekenai ia tabekau momokani. Lalohadai ma ta be unai “hudo” be reana tauanina ena masolo bona varovaro ia herevalaia. Unai siri ena badina herevadia dainai, reana unai kahadia edia manoka be “turia”—tauanina ena kahana goadadia—ida idia hahegeregerea edia idau hahedinaraia totona.
Herevana edia anina korikorina be dahaka, ita diba namonamo gauna be inai: Iehova ita gari henia mai hemataurai ida be aonega dalana. Dirava ena taravatu badinaia karana ese hari iseda tauanina do ia hanamoa. To danu, unai ese Iehova ena lalo-namo ia mailaia diba ita dekenai, bona unai ese ita do ia hakaua lao do ia ore lasi bona—tauanina dalanai bona hemami dalanai—gorere be lasi maurina namona dekenai, do ia havaraia tanobadana matamatana lalonai.—Isaia 33:24; Apokalupo 21:4; 22:2.
[Picture Credit Line on page 32]
Dr. G. Moscoso/SPL/Photo Researchers