Tomadiho ese Tanobada Ena Maino Do Ia Mailaia, A?

AUGUST 28 ia lao August 31, 2000 ai, tano 73 amo taunimanima 500 ia hanaia be idia mai hebou New York City dekenai. “Tomadiho Bona Lauma Daladia Idia Gunalaia Taudia Edia Milenium Ena Tanobada Mainona Ena Hebou” idia karaia totona United Nations dekenai idia hebou. Unai gunalaia taudia​—⁠idia momo be kwara gaudia, ia kakakaka sisina dabuadia, manu huina kwara gaudia, eiava dabua korema latadia idia atoa taudia​—⁠edia tomadiho be idauidau. Edia huanai be Bahai, Buddhist, Hindu, Islam, Iuda, Jain, Shinto, Sikh, Tao, Zoroaster, bona Kerisendom ena tomadiho idauidau idia noho.

Idia lao taudia ibounai be dina hani hebouna ena dina ginigunadia rua be United Nations dekenai idia hebou. To, unai hebou be United Nations ese ia hegaegaelaia lasi bona ena davana ia karaia lasi, to taunimanima durua oreadia idauidau haida ese idia karaia. To, UN bona tomadiho gunalaia taudia be gaukara hebou ena namo idia herevalaia, ogogami, bese idaudia inai henia karana, tanobada hadikaia karadia, tuari, bona taunimanima momo idia hamasea diba tuari gaudia haorea totona.

Idia lao taudia ibounai ese pepa ta ladana “Tanobada Mainona Badinaia” idia sainia. Ena be unai pepa ese ia hahedinaraia dagedage bona tuari be “tomadiho ena ladana dekenai nega haida” idia vara, to ia gwau idia sainia taudia be “maino havaraia totona . . . United Nations danu do idia gaukara hebou.” To, unai idia karaia totona hanamoa dalana ta idia hahedinaraia lasi.

Dina iharuana lalonai, unai hebou ena seketere-jeneral, Bawa Jain, be ena hamatamaia herevana ia hadokoa gwauraia neganai ia gwau, lagani haida gunanai, United Nations dekenai laulau ta ia itaia. Unai laulau dekenai tau latana ta ia gini, United Nations Secretariat rumana ia hanaia. Ia be unai ruma dekenai ia pidipidi noho, hegeregere iduara dekenai ia pidipidi bamona. Unai laulau ena henuai be inai hereva: “Maino Ena Lohia.” Mr. Jain ia gwau: “Unai [laulau] lau itaia negana amo egu lalona ia veria momokani. Taunimanima idauidau lau nanadaia [ena] anina be dahaka. Lau laloa hari ena haere lau abia vadaeni. Iniseniai umui hebou taudia ibounai, tanobada ena tomadiho bona lauma dalana gunalaia taudia, ese lau dekenai umui hahedinaraia, [inai] be unai maino ena lohia United Nations ena iduara dekenai ia pidipidi noho.”

Baibel be lalohadai idauna ia gwauraia. Ia hahedinaraia Iesu Keriso be Maino ena Lohia. Ia ese tanobada ena maino do ia mailaia, tanobada ena politikol o tomadiho ena gunalaia taudia edia heduru amo lasi, to Dirava ena Basileia amo. Unai Basileia​—⁠Dirava ena guba gavamanina​—⁠ese mai kwalimu ida kamonai taudia ibounai do ia hatamonaia bona tanobada dekenai Dirava ena ura do ia karaia.​—⁠Isaia 9:6; Mataio 6:​9, 10.