“Turana ese Oi Ia Hahisia”

APOSETOLO Paulo ia itaia Keristani taudia ginigunadia Galatia dekenai ia sisiba henia be namo. Toana be edia hemami dikana ia koua totona ia henanadai: “Edena bamona? Hereva momokani umui dekenai lau hamaoroa dainai, lau umui dagedage henia, a?”​​—⁠​Galatia 4:​16.

Paulo ese idia dekenai ‘hereva momokani ia hamaoroa dainai’ edia inai tauna ai ia lao lasi. To, ia be Baibel ena hakaua herevana ta ia badinaia, ia gwau: “Bema oiemu turana ese oi ia hahisia neganai, unai be oi do ia hanamoa totona.” (Aonega Herevadia 27:⁠6) Ia diba kerere tauna ena hemami be reana do ia dika. To danu, ia diba bema ta be kerere tauna amo mai anina matahakani ia koua, unai be hegeregere unai tauna amo Iehova Dirava ena lalokau karana ia koua. (Heberu 12:​5-7) Unai dainai, Paulo ia gari lasi to idia dekenai sisiba ia henia, badina ia be unai kongregesen ena turana namona bona nega daudau lalonai edia namo ia tahua vadaeni.

Hari inai negai, Iehova ena Witnes taudia ese idia abia haheganina idia badinaia dainai, ‘bese ibounai be diba tahua taudia idia halaoa, bona idia hadibaia [Iesu Keriso] ia henia hereva ibounai do idia badinaia.’ Unai lalo-momokani Keristani taudia ese unai idia karaia neganai, idia gini goada bona hahediba hereva koikoi edia kerere idia hahedinaraia bona Keristani lasi karadia idia gwauraia dika. (Mataio 15:9; 23:9; 28:​19, 20; 1 Korinto 6:​9, 10) Idia be ta ia dadaraia inai taudia bamona ai idia lao lasi, to idia ese turana korikorina ena ura namona idia hahedinaraia.

Salamo torea tauna ese Dirava amo lalo-parara ia abia dainai, ia gwau: “Tau namona ese, iena bogahisihisi dekena amo, lau do ia dadabaia, o lau dekenai do ia gwau henia, be namo.”​​—⁠Salamo 141:⁠5.