Guna Ai be Uda Sisia​—⁠Hari Ai be Mamoe!

Lau bona Sakina be kekeni maragidia neganai, idia be emai dekena taudia. Sakina be bada bona goada, to lau be kwadogi bona tauanina maragi kekenina. Nega momo ai heai, to dina ta dekenai ai heai bada. Unai dina amo, ai herevahereva lasi bona ai hedavari heheni lasi. Gabeai, gabu idauidau dekenai ai lao bona lau diba lasi ia be edeseniai ia noho.

Lagani 1994 ai, Iehova ena Witnes taudia ida Baibel lau stadilaia matamaia, bona sisina sisina egu kara lau haidaua. Lagani hani murinai, Bujumbura ai, Burundi dekenai, dina tamona hebouhebouna lalonai, lau hoa badina Sakina ida lau hedavari lou. Lau moale unuseniai ia noho dainai, to ai hedavari heheni namonamo lasi. Gabeai unai dina ai, lau hoa bada badina lau itaia bapatiso idia abia gwauraia taudia huanai ia noho! Ia danu ese ena kara ia haidaua momokani. Guna ia ida lau hepapahuahu momo, to hari ia be guna bamona heai hahine lasi. Ia ese Dirava dekenai sibona ia gwauhamatalaia karana be taunimanima vairanai ranu bapatisona amo ia hahedinaraia, bona unai lau itaia be namo herea momokani!

Ranu amo ia daekau neganai, karaharaga ia dekenai lau lao, lau rosia, bona gado maragina amo ena taiana dekenai lau gwau: “Iseda heai badana oi laloatao, a?” Ia gwau: “Oibe, lau laloatao, to unai be guna ia vara. Hari egu kara be idau.”

Ai ruaosi ai moale, badina taunimanima ia hatamonaia diba Baibel ena hereva momokani ai davaria bona badina emai kara ai haidaua bona hari ai be uda sisia bamona lasi, to Mamoe Naria Tauna Badana, Iehova Dirava, ena orea lalonai idia noho mamoe bamona. Momokani, Baibel ena hereva momokani ese mauri ia haidaua diba.