“Dirava Ena Basileia ai Do Ita Hedavari”
“Egu Turana! Rupert e, hari dina lau do idia hamasea herevana idia gwauraia. Lau totona oi tai lasi. Egu lalokau be oi bona ruma taudia ibounai dekenai lau siaia inai. Dirava ena Basileia ai do ita hedavari.”
JUNE 8, 1942 ai, Nazi tuari taudia ese Franc Drozg idia do pidia lasi neganai, unai hereva ia torea. Dahaka dainai idia hamasea?
Maribor, Slovenia dekenai, Museum of National Liberation dekenai idia noho sivarai idia gwau, unai mauri lagani 38 tauna, auri gaukaralaia tauna, be Slovenia dekenai German ena ami oreana ta, Wehrmannschaft, lalonai ia ura lasi ia vareai. Ia be Bibelforscher eiava Bible Stiuden ta, unai neganai Iehova ena Witnes taudia be unai bamona idia gwauraia. Isaia 2:4 ena hereva ia badinaia dainai, ia ese Nazi tuarina ia durua lasi, ia gwau ia be Dirava ena Basileia henunai do ia noho tauna.—Mataio 6:33.
Franc ena noho gabuna Ptuj dekenai, taunimanima idia diba ia be Dirava ena Basileia sivaraina namona harorolaia goadagoada tauna ta. (Mataio 24:14) Herevana ena mauri ia auka, to sivarai namona harorolaia gaukarana ia hadokoa lasi ela bona May 1942 ai, idia dogoatao.
Iehova ena Slovenia Witnes taudia momo be hanaihanai Nazi taudia ese idia dagedage henidia. Idia hamasea tauna ginigunana ta be Franc, ia abia dae tomadiho hahediba herevadia dainai idia hamasea. Aposetolo taudia edia nega ai idia noho Keristani taudia bamona, ia be inai hereva ese ia hagoadaia: “Hisihisi momo lalonai Dirava ena Basileia do ita raka vareai.” (Kara 14:22) Ia abia dae unai guba gavamanina be gau korikorina dainai, ena hereva dokonai ia hedinarai, “Dirava ena Basileia ai do ita hedavari.”
[Picture Credit Lines on page 32]
Franc Drozg: Photo Archive-Museum of National Liberation Maribor, Slovenia; letter: Original kept in Museum of National Liberation Maribor, Slovenia